FLASH
Shkruar nga Pamfleti
Tragjedia në Texas merr një kthesë edhe më të errët. Sipas autoriteteve të Kerr County, 27 vajza janë raportuar të zhdukura nga Camp Mystic, një kamp i njohur veror për vajza të vendosur pranë lumit Guadalupe. Të paktën një vajzë, 9-vjeçarja Janie Hunt, është konfirmuar e vdekur nga nëna e saj në një deklaratë për CNN.
Camp Mystic, i themeluar në vitin 1926 në qytetin Hunt, strehon rreth 750 vajza çdo verë, në një mjedis të përshkruar si “frymë kristiane dhe rritje personale”. Por këtë verë, ëndrra e qindra familjeve amerikane është kthyer në makth.
Lumi Guadalupe, që kalon afër kampit, u ngrit me mbi 20 këmbë (6 metra) brenda më pak se dy orësh – një rritje që e zuri kampin në befasi dhe nuk la kohë për evakuim të organizuar. Aksesi drejt kampit ishte i pamundur për orë të tëra.
Në orët e para të së premtes, 107 roje të egërsisë dhe njësi ajrore speciale tentuan të hynin në kamp, por vetëm pas mesditës arritën të hyjnë dhe të fillojnë shpëtimin e fëmijëve. Fatkeqësisht, për disa vajza ndihma erdhi shumë vonë.
Menaxheri i qytetit Kerrville, Dalton Rice, tha se autoritetet nuk kanë një numër të saktë të personave të zhdukur përtej kampit. “Nuk duam të spekulojmë”, u shpreh ai, duke nënvizuar se situata mbetet kritike dhe në zhvillim.
Camp Mystic promovonte vlera shpirtërore, miqësi dhe vetëbesim për vajzat. “Bëhu personi më i mirë që mund të jesh,” thuhet në misionin e kampit. Sot, këto fjalë tingëllojnë tragjikisht ironike, ndërsa një komunitet lutet për shpëtimin e atyre që mungojnë.
Lini një Përgjigje