FLASH
Shkruar nga Pamfleti
Stamboll– Raundi i tretë i bisedimeve mes delegacioneve të Rusisë dhe Ukrainës përfundoi të mërkurën në Stamboll pas rreth 40 minutash diskutimesh. Rezultati kryesor ishte marrëveshja për shkëmbim të të burgosurve, ku palët ranë dakord të shkëmbejnë jo vetëm ushtarakë, por edhe civilë.
Sipas kryenegociatorit rus, Vladimir Medinsky, është arritur një marrëveshje për shkëmbimin e 1.200 të burgosurve për secilën palë. Ai tha se Rusia i ka propozuar Ukrainës të shqyrtojë armëpushime të shkurtra prej 24 deri 48 orësh përgjatë vijës së frontit, për të mundësuar evakuimin e të plagosurve dhe rikuperimin e trupave të viktimave.
“E kemi përsëritur propozimin tonë për armëpushime të shkurtra në mënyrë që ekipet mjekësore të kenë mundësi të kryejnë punën e tyre”, deklaroi Medinsky.
Nga ana tjetër, delegacioni ukrainas, i kryesuar nga Rustem Umerov, i propozoi palës ruse një takim të drejtpërdrejtë mes presidentëve Vladimir Putin dhe Volodymyr Zelensky në muajin gusht. Umerov tha se një takim i tillë “do të kishte një vlerë më të madhe” nëse do të merrnin pjesë edhe presidenti amerikan Donald Trump dhe presidenti turk Recep Tayyip Erdogan.
Megjithatë, çështja e armëpushimit nuk pati rezultat konkret, ndërsa palët theksuan se pozicionet e tyre mbi memorandumet e marrëveshjes mbeten larg njëra-tjetrës.
“Kemi diskutuar gjatë për qëndrimet e shprehura nga të dyja palët, por diferencat mbeten të mëdha. Kemi rënë dakord të vazhdojmë kontaktet, si në nivel delegacionesh, ashtu edhe të grupeve të punës”, shtoi Medinsky.
Takimi u zhvillua nën ndërmjetësimin e ministrit të Jashtëm të Turqisë, Hakan Fidan, i cili i bëri thirrje palëve që të ndalojnë sa më shpejt “këtë luftë të përgjakshme”.
“Qëllimi ynë është t’i japim fund kësaj lufte që ka kosto shumë të lartë, sa më shpejt të jetë e mundur. Synimi final është një armëpushim që hap rrugën drejt paqes”, tha Fidan, duke falënderuar liderët rusë dhe ukrainas për gatishmërinë e tyre për dialog, si dhe presidentin amerikan Donald Trump për apelët e tij për përfundimin e luftës.
Megjithëse përparimi politik mbetet i kufizuar, raundi i tretë i bisedimeve solli zhvillime të rëndësishme në aspektin humanitar, përfshirë shkëmbimin e të burgosurve dhe diskutimin për një mundësi armëpushimi afatshkurtër.
Lini një Përgjigje