FLASH
Shkruar nga Pamfleti
Ambasadori i Ukrainës në Izrael tha se afro 1.000 ukrainas kanë kërkuar ndihmë në Ambasadën ukrainase në Tel Aviv për t’u evakuuar, pas shpërthimit të luftimeve midis Izraelit dhe militantëve palestinezë të Hamasit.
Ambasadori Yevhen Korniychuk tha për REL se numri i ukrainasve që po kërkojnë të largohen është rritur dhe kjo gjë krijon një problem të ndërlikuar.
“Nuk kemi se ku t’i evakuojmë qytetarët. Ne nuk do t’i transportojmë njerëzit nga një luftë në një luftë tjetër. Synimi ynë kryesor është që të largojmë sa më shumë njerëz në një periudhë të shkurtër kohore”, tha Korniychuk.
Nga e gjithë popullata rusishfolëse në Izrael, pothuajse gjysmë milion persona janë me origjinë ukrainase.
“Të gjithë këta persona ose kanë pasaportë ukrainase ose kanë të drejtë të kenë një pasaportë të tillë”, tha ambasadori Korniychuk, duke shtuar se për aq kohë sa Ukraina vazhdon luftën kundër pushtimit rus, Kievi nuk ka mundësi që të paguajë për fluturimet e këtyre persona.
Ai u shpreh se 15.000 shtetas ukrainas janë regjistruar në Konsullatë, duke theksuar se këta janë persona që vetë kanë zgjedhur të regjistrohen. Sipas kësaj liste, 160 ukrainas punojnë në Gaza.
Më 7 tetor, grupi militant nga Hamasi nisi sulmin më të madh ndaj Izraelit në vite, duke e sulmuar nga toka, ajri dhe deti. Izraeli u kundërpërgjigj me sulme të ashpra dhe po vazhdon që ta bombardojë Gazën, territor ku jetojnë rreth 2 milionë banorë.
Lini një Përgjigje