FLASH
Shkruar nga Pamfleti
Garden party në Uashington mbledh qindra të ftuar në përpjekje për të forcuar marrëdhëniet transatlantike
Mbreti Charles dhe Mbretëresha Kamila e mbyllën ditën e parë të vizitës së tyre historike në Shtetet e Bashkuara me një festë madhështore në kopsht për 650 të ftuar në Uashington. Festa madhështore u mbajt për nder të tyre në rezidencën e Ambasadorit Britanik në Uashington, ndërsa dita e parë e vizitës së tyre po mbaronte. Eventi mblodhi së bashku figura të shquara britanike dhe amerikane, përfshirë politikanë dhe personalitete, si dhe bamirës dhe yje sporti, ndërsa monarku britanik kërkon të forcojë marrëdhëniet e tensionuara transatlantike.
Mbreti Charles organizoi festën në kopsht disa orë pas uljes në Bazën e Përbashkët Andrews, ku u prit me dhurata dhe një bandë ushtarake, ndërsa zbriti nga avioni dhe eci në një qilim të kuq. Charles, 77 vjeç, dhe gruaja e tij Camilla u transportuan më pas me autokolonë në Shtëpinë e Bardhë, ku u pritën nga Presidenti i SHBA-së Donald Trump dhe Zonja e Parë, Melania. Çifti mbretëror piu çaj në Dhomën e Gjelbër dhe u çuan në kopësht për të parë një koshere bletësh, e cila u rindërtua së fundmi në një version miniaturë të Shtëpisë së Bardhë, përpara se të merrnin pjesë në një festë në ambasadën britanike.
Të ftuarit shijuan 3,000 sanduiçe të përgatitura me dorë me salmon të tymosur skocez, mish viçi të pjekur dhe sanduiçe me rrikë, të përgatitura me produkte britanike të importuara pa tarifa sipas marrëveshjeve të reja tregtare, si dhe majonezë me vezë, kastravec turshi dhe ëmbëlsira tradicionale angleze “scones”.
Ndër të pranishmit ishin kampioni olimpik në kërcime në ujë Tom Daley dhe futbollistja Esme Morgan, kampione bote me Anglinë dhe aktualisht pjesë e Washington Spirit. Nga politika morën pjesë sekretari i Thesarit Scott Bessent, senatori Ted Cruz, ish-kryetarja e Dhomës së Përfaqësuesve Nancy Pelosi dhe kryetari aktual Mike Johnson.
Një turmë entuziaste u mblodh rreth mbretit teksa ai lëvizte nëpër kopsht. Mes të ftuarve ishin gjithashtu kryetarja e bashkisë së Uashingtonit Muriel Bowser, analistja Kellyanne Conway, kongresmeni republikan Michael McCaul dhe ish-guvernatori i Virxhinias Glenn Youngkin. Atmosfera e qetë nën diell nuk reflektonte tensionet në marrëdhëniet dypalëshe.
Vizita katërditore zhvillohet në kuadër të 250-vjetorit të pavarësisë së SHBA-së, por në sfond të një përçarjeje diplomatike lidhur me politikën e presidentit Trump ndaj Iranit dhe shqetësimeve për sigurinë pas një incidenti me armë në hotelin Washington Hilton gjatë fundjavës. Një person i armatosur hapi zjarr, duke detyruar shërbimet sekrete të largonin presidentin nga salla. Autoritetet besojnë se ai dhe anëtarë të administratës ishin objektiva të mundshëm, çka çoi në rishikim urgjent të masave të sigurisë përpara vizitës së mbretit.
Sipas The Guardian, motoja e mbretit është “ruani qetësinë dhe vazhdoni përpara”. Pallati Buckingham njoftoi se vizita u realizua pas konsultimeve me autoritetet amerikane, duke falënderuar ata që punuan për të garantuar zhvillimin e saj.
Të martën (28 prill), mbreti pritet të mbajë një fjalim në një banket zyrtar në Shtëpinë e Bardhë dhe të mbajë një fjalim të rrallë në Kongresin amerikan. Ai pritet të theksojë se, edhe pse dy vendet nuk kanë qenë gjithmonë dakord, traditat e përbashkëta demokratike dhe ligjore i kanë afruar vazhdimisht.
Mbreti do të përmendë shkurt edhe incidentin me armë dhe do të shprehë “vlerësimin dhe miqësinë më të lartë të popullit britanik ndaj popullit amerikan”. Kjo është vetëm hera e dytë që një monark britanik i drejtohet një seance të përbashkët të Kongresit, pas mbretëreshës Elizabeth II në vitin 1991.
Më pas, ai do të udhëtojë në Nju Jork për të vizituar memorialin e 11 shtatorit dhe më tej në Virxhinia, ku do të takohet me organizata mjedisore, duke mbështetur një kauzë që e promovon prej më shumë se 50 vitesh.
Megjithatë, disa politikanë britanikë shprehin shqetësim se vizita mund të sjellë situata të sikletshme, veçanërisht në kontekstin e deklaratave të fundit të Trump ndaj Papa Leo XIV dhe kritikave ndaj kryeministrit britanik Keir Starmer. Gjithashtu, rrjedhjet nga Pentagoni mbi rishikimin e mbështetjes për sovranitetin britanik në Ishujt Falkland kanë shtuar shqetësimet.
Presidenti Trump ka ndarë publikisht vlerësimin për mbretin nga kritikat ndaj qeverisë britanike, duke e quajtur Charles “një njeri të madh” dhe “mik”, dhe duke sugjeruar se prania e tij mund të ndihmojë në stabilizimin e marrëdhënieve.
Ambasadori britanik në SHBA, Christian Turner, deklaroi për CBS se marrëdhëniet mes dy vendeve kanë kaluar kriza edhe më parë, por kanë mbetur të forta falë bazës së tyre të thellë në siguri dhe bashkëpunim.
Në të njëjtën kohë, rikthehet në vëmendje edhe çështja e princit Andrew dhe lidhjet e tij me Jeffrey Epstein. Kongresmeni demokrat Ro Khanna u bëri thirrje mbretit të takohet me viktimat, por autoritetet britanike kanë përjashtuar një mundësi të tillë për arsye ligjore.
Kjo është vizita e parë zyrtare e Charles në SHBA si mbret, megjithëse ai e ka vizituar vendin 19 herë më parë. Në interpretim, vizita synon të ruajë stabilitetin e marrëdhënieve SHBA–Britani në një moment sfidues politik dhe diplomatik. /Pamfleti/
Lini një Përgjigje