FLASH
Shkruar nga Pamfleti
Rusia ushtron presion mbi vendet baltike, ndërsa shpreson të dekurajojë publikun nga mbështetja e Ukrainës, thotë komisioneri i mbrojtjes i BE-së
Komisioneri i mbrojtjes i BE-së, Andrius Kubilius, ka akuzuar Kremlinin se po përdor taktika frikësimi kundër vendeve baltike për të testuar angazhimin e tyre në mbështetjen e Ukrainës.
“Moska po bëhet nervoze dhe ... radikalizohet në sulmet e saj hibride kundër shteteve baltike si një përgjigje ndaj përkeqësimit të situatës në vijën e frontit në Ukrainë”, tha Kubilius duke iu përgjigjur retorikës në rritje nga Rusia.
Ai theksoi se Rusia synon që të bëjë qytetarët e këtyre vendeve që të mos e mbështesin më ndihmën ndaj Ukrainës.
“Duke bërë deklarata dhe akuza kundër rajonit Putin dëshiron që njerëzit në ato vende… të fillojnë të hezitojnë për vazhdimin e mbështetjes së tyre për Ukrainën, investimet në mbrojtje e kështu me radhë. Përgjigja jonë duhet të jetë shumë e qartë, të vazhdojmë atë që po bëjmë deri më tani, të rrisim shpenzimet tona të mbrojtjes. Mendoj se Bashkimi Evropian mund të kërkojë mënyra për t'i mbështetur edhe më shumë të gjitha vendet e krahut lindor”, tha ai në një video-thirrje me Shaun Walker të Guardian.
Duke iu përgjigjur njoftimeve për ndërhyrje aksidentale të dronëve ukrainas të bllokuar në hapësirën ajrore të Baltikut, Kubilius tha se udhëheqësit politikë të rajonit tashmë po e diskutojnë këtë çështje me Ukrainën.
“Por ajo që është shumë e rëndësishme është që të gjitha vendet kufitare, veçanërisht për vendet baltike,… të forcojnë aftësitë e tyre kur bëhet fjalë për zbulimin dhe reagimin ndaj dronëve”, tha ai.
Kubilius shtoi se sistemet ekzistuese nuk ishin mjaftueshëm të mira dhe kishin nevojë për një përmirësim urgjent.
“Edhe në vendin tim, në Lituani, ka një konfuzion nëse ka pasur apo jo një dron. Aftësia e zbulimit ende nuk është në atë nivel. Sistemi i radarit që është krijuar është i mirë për të parë avionët luftarakë ose raketat armike, por jo aq i mirë për të zbuluar dronët. Dhe sapo të zbulohen dronët, sigurisht që vendet duhet të kenë mjete me kosto efektive për t'i shkatërruar ato“, tha ai.
Lini një Përgjigje