FLASH
Shkruar nga Pamfleti
Kina ka prezantuar një zhvillim që po trondit botën e shkencës dhe etikës: krijimin e një roboti humanoid që mund të mbajë dhe çojë deri në fund një shtatzëni njerëzore.
Ky projekt inovativ është prezantuar nga kompania “Kaiwa Technology” në Konferencën Botërore të Robotëve 2025 në Pekin, me synimin që prototipi i parë të realizohet në vitin 2026.
Mitra artificiale është konceptuar për të simuluar të gjitha fazat e një shtatzënie natyrale nga fekondimi deri te lindja. Embrioni do të zhvillohet në një mjedis sintetik me lëng amniotik dhe do të furnizohet me oksigjen e lëndë ushqyese përmes një tubi që imiton kordonin kërthizor.
Nëse realizohet me sukses, kjo do të ishte hera e parë që një robot arrin të përfundojë një shtatzëni pa ndërhyrjen e një nënë zëvendësuese biologjike.
Teknologjia shihet si një shpresë e madhe për çiftet infertile, komunitetin LGBTQ+ dhe gratë me rrezik shëndetësor gjatë shtatzënisë.
Me një kosto të parashikuar rreth 14 mijë dollarë, ajo mund të shndërrohet në një alternativë më të përballueshme ndaj shërbimeve të nënave zëvendësuese, të cilat janë të kushtueshme dhe të diskutueshme në shumë vende.
Megjithatë, përtej entuziazmit shkencor, kjo risi ka ngritur dilema të mëdha etike dhe sociale: si do të ndikohet lidhja natyrore mes nënës dhe fëmijës?
A do të ndryshojë koncepti tradicional i familjes?
Dhe, a është e gatshme shoqëria të pranojë një realitet të tillë? Për më tepër, legjislacioni aktual në Kinë kufizon zhvillimin e embrioneve jashtë trupit përtej 14 ditëve, çka do të kërkojë ndryshime ligjore për realizimin e këtij projekti deri në lindjen e plotë.
Nëse planet ecin sipas pritshmërive, në vitin 2026 bota mund të bëhet dëshmitare e një momenti historik: lindja e parë e një foshnjeje nga një robot.
Një epokë e re po afrohet, por jo pa polemika.
Lini një Përgjigje