FLASH
Shkruar nga Pamfleti
Disa aeroporte në Itali po përballen me mungesë të karburantit për avionët, duke detyruar autoritetet të vendosin kufizime të përkohshme për furnizimin dhe operimin e fluturimeve.
Sipas njoftimeve zyrtare aeronautike (Notam), aeroporti i Brindisit nuk ka aktualisht karburant Jet A1 të disponueshëm deri në orën 14:00 të datës 7 prill. Furnizimi i kufizuar është rezervuar vetëm për fluturime shtetërore, operacione kërkim-shpëtimi dhe fluturime mjekësore. Kompanitë ajrore janë udhëzuar të planifikojnë furnizimin nga aeroporte të tjera për të përballuar itineraret e tyre.
Sipas informacioneve nga sektori, kufizimi në Brindisi lidhet me kërkesa të pazakonta për sasi shtesë karburanti nga operatorët ajrorë, çka ka ushtruar presion mbi furnizuesit. Një nga distributorët kryesorë ka kërkuar kufizimin e shpërndarjes, ndërsa burime të brendshme flasin për rezerva rreth 150 mijë litra, të mjaftueshme për rreth 50 fluturime të shkurtra.
Probleme të ngjashme janë raportuar edhe në aeroporte të tjera. Në Reggio Calabria është vendosur një kufi maksimal furnizimi prej 3 mijë litrash për avion, për shkak të disponueshmërisë së reduktuar. Masa konsiderohet paraprake, në pritje të furnizimeve të reja.
Ndërkohë, në aeroportin e Pescara-s operon vetëm një autocisternë me rreth 20 mijë litra karburant, pasi një mjet tjetër është jashtë funksionit që prej disa ditësh.
Këto zhvillime shtojnë shqetësimet për një efekt zinxhir në furnizimin me karburant në rrjetin ajror italian, në një moment kur kërkesa për fluturime mbetet e lartë dhe çdo ndërprerje mund të ndikojë në operacionet e kompanive ajrore.
Lini një Përgjigje