FLASH
Shkruar nga PamfletiNgjarja vjen në një moment të ndjeshëm politik, vetëm një javë para zgjedhjeve në Hungari, të cilat do të përcaktojnë nëse Orban do të zgjasë më tej pushtetin e tij.
Zbulimi i mjeteve shpërthyese pranë infrastrukturës së gazit në veri të Serbisë ka nxitur reagime të menjëhershme nga autoritetet dhe ka hapur debat mbi natyrën e ngjarjes dhe përdorimin e saj në kontekst politik.
Presidenti i Serbisë bëri të ditur se pranë fshatit Velebit, afër gazsjellësit që lidh Serbinë me Hungarinë, u gjetën dy pako të mëdha me eksplozivë. Ai komunikoi drejtpërdrejt me kryeministrin hungarez për ta informuar mbi zhvillimet. Në të njëjtën kohë, forcat e policisë dhe ushtrisë vendosën kontrolle në zonë dhe bllokuan disa akse rrugore në komunën e Kanjižës, duke kontrolluar terrenin me patrulla të përbashkëta.
Rasti mori shpejt dimension politik. Përfaqësues të komunitetit hungarez në Vojvodinë e interpretuan ngjarjen si një përpjekje për të goditur interesat e Hungarisë. Ata theksuan se një sulm i mundshëm ndaj gazsjellësit do të rrezikonte furnizimin me energji dhe sigurinë e banorëve në rajon.
Nga ana tjetër, analistë të sigurisë ngritën dyshime mbi mënyrën se si po prezantohet informacioni. Ata vunë në dukje se në raste të mëparshme, autoritetet kanë krijuar alarm publik pa dhënë më pas sqarime të plota. Sipas tyre, mungesa e detajeve konkrete dhe precedenti i rasteve të ngjashme kërkojnë kujdes në interpretim, shkruan Danas.
Naim Beshiri, drejtor i Institutit për Çështje Evropiane, i thotë Danas se kjo duket si një “teatër politik serbo-hungarez i drejtuar me kujdes”, që synon kryesisht elektoratin në Hungari, i cili ka rreth 20 përqind të të pavendosurve që do të vendosin zgjedhjet.
"Në kohë krize, mesazhi është i qartë: mos krijoni valë, qëndroni tek e njohura dhe e qëndrueshme. Brenda këtij kuadri, Viktor Orban do të luajë kartën e gjashtëmbëdhjetë viteve të përvojës së tij, me një demonstrim kontrolli përmes angazhimit të policisë, ushtrisë dhe organeve të sigurisë kombëtare, me qëllim marrjen e plotë të hapësirës mediatike në shtatë ditët e ardhshme. Kështu, edhe pa një fitore formale, ai mund të sigurojë mbijetesën politike përmes mënyrës se si është ngritur sistemi zgjedhor në Hungari" , thotë Beshiri.
Diskutimi u zgjerua edhe në lidhje me klimën politike në Hungari. Kryeministri hungarez thirri Këshillin e Mbrojtjes pas incidentit, ndërsa zgjedhjet parlamentare afrohen. Analistët vlerësojnë se situata të tilla mund të ndikojnë në perceptimin e sigurisë dhe të përdoren për të forcuar mesazhe politike në prag të votimit.
Vëzhgues të tjerë e lidhin zhvillimin me interesa më të gjera ekonomike dhe politike mes dy vendeve. Ata përmendin negociata në sektorë strategjikë dhe theksojnë se çështjet e sigurisë shpesh shfaqen paralelisht me procese të rëndësishme vendimmarrjeje.
Institucionet vazhdojnë hetimet për të përcaktuar rrethanat e sakta të incidentit. Ende nuk ka një version përfundimtar mbi qëllimin dhe autorët e vendosjes së eksplozivëve.
Ngjarja vjen në një moment të ndjeshëm politik, vetëm një javë para zgjedhjeve në Hungari, të cilat do të përcaktojnë nëse Orban do të zgjasë më tej pushtetin e tij.
Lini një Përgjigje