FLASH
Shkruar nga PamfletiTrump kritikoi ashpër gjyqtarët e Gjykatës së Lartë të cilët bllokuan tarifat globale që ai vendosi, duke i quajtur ato një "turp për kombin" dhe më vonë duke nënshkruar dokumente që vendosin një tarifë prej 10% për të gjitha vendet.
Presidenti francez Emmanuel Macron reagoi ndaj vendimit të Gjykatës Supreme të Shteteve të Bashkuara që rrëzoi tarifat e vendosura nga presidenti Donald Trump, duke e cilësuar atë si dëshmi të funksionimit të mekanizmave të kontrollit në një demokraci.
Gjatë një aktiviteti në panairin vjetor bujqësor në Paris, Macron theksoi rëndësinë e ekzistencës së një gjykate të pavarur dhe të sundimit të ligjit. Ai nënvizoi se sistemi demokratik kërkon balancë mes pushteteve dhe kontroll mbi autoritetin ekzekutiv.
“Nuk është keq të kesh një Gjykatë Supreme dhe sundim të ligjit...Është mirë të kesh pushtet dhe kundërpesha ndaj pushtetit në demokraci”, theksoi Macron.
Lidhur me tarifën e re globale prej 10 për qind të shpallur nga Trump, Macron deklaroi se autoritetet franceze do të analizojnë pasojat që mund të ketë kjo masë për ekonominë e vendit. Ai shtoi se Franca do të vijojë eksportet e produkteve të saj.
Të premten, Gjykata Supreme e SHBA vendosi me shumicë 6 me 3 të lërë në fuqi një vendim të një gjykate më të ulët, e cila kishte konstatuar se presidenti kishte tejkaluar kompetencat kushtetuese duke përdorur një ligj të vitit 1977, i parashikuar për emergjenca kombëtare, për të justifikuar tarifat gjithëpërfshirëse.
Vendimi u hartua nga kryetari i Gjykatës, John Roberts. Tre gjyqtare liberale dhe tre gjyqtarë konservatorë votuan së bashku për të rrëzuar masën, duke krijuar një shumicë të përbashkët kundër tarifave.
Vendimi hap një fazë të re për politikën tregtare amerikane dhe ndikimin e saj në marrëdhëniet ekonomike ndërkombëtare.
Trump në sulm ndaj gjyqtarëve
Presidenti i SHBA-së, Donald Trump, ka vendosur një tarifë të re globale prej 10% për të zëvendësuar ato të rrëzuara nga Gjykata Supreme, duke e quajtur vendimin "të tmerrshëm" dhe duke i kritikuar ashpër gjyqtarët që hodhën poshtë politikën e tij tregtare.
Presidenti e zbuloi planin menjëherë pasi gjyqtarët nxorën jashtë ligjit shumicën e tarifave globale që Shtëpia e Bardhë njoftoi vitin e kaluar. Me një vendim 6-3, gjykata vendosi që presidenti kishte tejkaluar kompetencat e tij.
Vendimi ishte një fitore e madhe për bizneset dhe shtetet amerikane që kishin sfiduar detyrimet, duke hapur derën për miliarda dollarë rimbursime tarifore, ndërkohë që gjithashtu nxiti pasiguri të reja në peizazhin global të tregtisë.
"Anëtarët e Gjykatës Supreme që votuan kundër tarifave tona, duhet të turpërohen. Vendimi i tyre ishte qesharak, por tani që fillon procesi i përshtatjes, ne do të bëjmë gjithçka që mundemi për të marrë më shumë para se më parë", shkroi Trump në Truth.
Tarifat globale prej 10% të vendosura nga Donald Trump do të hyjnë në fuqi në mesnatën e 24 shkurtit dhe do të mbeten në fuqi për 150 ditë. Tarifat nuk do të zbatohen për një gamë të gjerë produktesh, duke përfshirë mineralet thelbësore dhe mallrat që tashmë i nënshtrohen tarifave të veçanta të paprekura nga vendimi i Gjykatës së Lartë.
Duke folur nga Shtëpia e Bardhë të premten, Trump la të kuptohej se rimbursimet nuk do të vinin pa një betejë ligjore, duke thënë se priste që çështja të ngecej në gjykatë për vite me radhë.
Ai tha gjithashtu se do t'i drejtohej ligjeve të tjera për të ecur përpara me tarifat e tij, të cilat sipas tij inkurajojnë investimet dhe prodhimin në SHBA.
Lini një Përgjigje