FLASH
Shkruar nga PamfletiVetëm Kongresi ka fuqinë të vendosë për masa të tilla, argumenton gjykata e specializuar në çështjet e tregtisë ndërkombëtare, ndërsa qeveria amerikane ka apeluar vendimin.
Një tjetër goditje për tarifat doganore të Donald Trump.
Gjykata e Tregtisë Ndërkombëtare, një gjykatë federale me seli në Nju Jork dhe kompetencë në çështjet e tregtisë së jashtme dhe doganave, ka anuluar të ashtuquajturat tarifa halmarrëse të vendosura nga administrata, duke i shpallur të paligjshme.
Në vendimin e publikuar të mërkurën, gjyqtarët kanë konstatuar se Trump ka abuzuar me International Emergency Economic Powers Act (IEEPA), ligji i vitit 1977 i përdorur si bazë për vendosjen e tarifave mbi pjesën më të madhe të produkteve të importuara.
“Ky ligj nuk e autorizon presidentin të vendosë një mbitarifë të pakufizuar mbi mallrat që vijnë pothuajse nga të gjitha vendet e botës”, thuhet në vendim.
Tarifat, të paktën 10%, ishin vendosur nga Trump gjatë të ashtuquajturit “Dita e Çlirimit”, me synimin e deklaruar për të balancuar deficitin tregtar të Shteteve të Bashkuara. Por sipas gjykatës, përdorimi i IEEPA-s nuk mund të zëvendësojë kompetencat legjislative të Kongresit, i cili është organi i vetëm i autorizuar për të vendosur për çështje tarifash.
Sipas gjyqtarëve , urdhrat ekzekutivë të 2 prillit, të cilët vendosën tarifa prej të paktën 10% për të gjitha produktet e importuara dhe deri në 50% në varësi të vendit të origjinës, "tejkalojnë kompetencat e dhëna presidentit sipas ligjit IEEPA për të rregulluar importet përmes përdorimit të tarifave doganore".
Vendimi erdhi pas një sërë padish të ngritura nga biznese të vogla, si distributori i verërave V.O.S. Selections, dhe nga dymbëdhjetë shtete amerikane të udhëhequra nga Oregoni.
“Vendimi riafirmon se ligjet tona kanë vlerë dhe se politika tregtare nuk mund të varet nga humori i presidentit”, deklaroi Prokurori i Përgjithshëm i Oregonit, Dan Rayfield.
Reagimi i Shtëpisë së Bardhë ka qenë i ashpër, duke paralajmëruar apel ndaj vendimit:
“Nuk u takon gjyqtarëve të pa zgjedhur të vendosin si të përballohet siç duhet një emergjencë kombëtare,” deklaroi një zëdhënës i administratës.
“Presidenti Trump është angazhuar të vendosë Amerikën të parën dhe të përdorë çdo mjet të pushtetit ekzekutiv për të përballuar këtë krizë dhe për të rikthyer madhështinë.”
Lini një Përgjigje