FLASH
Shkruar nga Pamfleti
Kancelari gjerman në Izrael: Po për shtetin palestinez, por jo tani
Kancelari gjerman Friedrich Merz ka riafirmuar mbështetjen për krijimin e një shteti palestinez, ndërkohë që kryeministri izraelit Benjamin Netanyahu ka përsëritur kundërshtimin e tij ndaj një lëvizjeje të tillë, gjatë vizitës së parë zyrtare të Merz në Izrael si kancelar.
Në një konferencë të përbashkët për shtyp të mbajtur në Jeruzalem pas takimit mes dy liderëve, të dy shpalosën qëndrimet e tyre për çështjen e Gazës dhe të territoreve të pushtuara të Bregut Perëndimor.
Vizita e Merz po zhvillohet nën hijen e luftës izraelite në Gaza, një konflikt që shumë zëra ndërkombëtarë e kanë cilësuar si gjenocid. Megjithatë, Merz, udhëheqësi i njërit prej vendeve më aleate të Izraelit, nuk e konsideron këtë luftë si të tillë.
Merz deklaroi se Gjermania synon një Lindje të Mesme të re, ku shteti i Palestinës të ekzistojë krah për krah me Izraelin. Ai e quajti këtë vizion si “perspektivën më të mirë për të ardhmen”. Por nga ana tjetër, shtoi se qeveria e tij nuk ka ndërmend të njohë një shtet palestinez në një të ardhme të afërt. Sipas tij, një njohje e tillë duhet të vijë vetëm në përfundim të një procesi negociatash paqeje, jo në fillim të tij, një qëndrim që e vendos Gjermaninë në kontrast me disa shtete të tjera europiane si Franca, Spanja dhe Britania e Madhe, të cilat tashmë kanë shpallur njohjen zyrtare të Palestinës.
Netanyahu nga ana tjetër deklaroi se populli izraelit është kundër çdo zgjidhjeje me dy shtete dhe ritheksoi se çështja e aneksimit politik të Bregut Perëndimor, që Merz e kundërshtoi dhe që ishte gjithashtu refuzuar nga administrata e mëparshme amerikane e Donald Trump, mbetet ende një temë diskutimi, megjithëse status quo-ja do të mbetet e pandryshuar për një të ardhme të afërt. Netanyahu shtoi se “qëllimi i një shteti palestinez është shkatërrimi i shtetit hebre”, pa dhënë më shumë detaje.
Ai njoftoi gjithashtu se faza e parë e planit të Gazës, sipas formulës së Trump, është drejt përfundimit dhe se në fund të dhjetorit do të zhvillojë “bisedime shumë të rëndësishme” për të siguruar zbatimin e fazës së dytë. Ai konfirmoi se gjatë kësaj periudhe do të takohet edhe me vetë Trump.
Lufta në Gaza ka vënë në provë marrëdhëniet tradicionale të forta mes Gjermanisë dhe Izraelit, pasi mbështetja për Izraelin është pjesë e thelbit të politikës së jashtme gjermane, e lidhur fort me ndjenjën e përgjegjësisë historike për Holokaustin.
Në gusht, ndërhyrjet ushtarake të Izraelit në Gaza bënë që Gjermania, furnizuesi i dytë më i madh i armëve për Izraelin pas SHBA-së, të kufizonte eksportin e armëve për përdorim në Gaza. Në atë kohë, Merz kritikoi publikisht veprimet e Izraelit, një veprim i rrallë për një udhëheqës gjerman, duke deklaruar se qeveria e tij nuk mund të injoronte më pasojat ndaj civilëve palestinezë.
Këto kufizime u hoqën dy javë më parë, dhe Netanyahu kishte shprehur hapur pakënaqësinë për to. Në konferencën për shtyp, Merz u përpoq të zbutte tonin, duke theksuar se vendimi për të kufizuar përkohësisht eksportet e armëve nuk kishte ndryshuar “qëndrimin bazë të Gjermanisë ndaj sigurisë së Izraelit dhe mbështetjes së saj ushtarake”.
Vizita e Merz në Izrael, e cila ndodhi shtatë muaj pas marrjes së detyrës si kancelar, erdhi më vonë në krahasim me paraardhësit e tij: Olaf Scholz kishte vizituar Izraelin pas tre muajsh në detyrë, ndërsa Angela Merkel pas vetëm dy muajsh.
Në konferencën e përbashkët, Merz konfirmoi se nuk ishte diskutuar asnjë vizitë e mundshme e Netanyahu-t në Berlin, një temë që mbetet delikate për shkak të fletëarrestit ndërkombëtar nga Gjykata Penale Ndërkombëtare (ICC) ndaj Netanyahu-t për krime lufte në Gaza. Merz tha se “nuk ka arsye për ta diskutuar këtë për momentin”, por nuk përjashtoi një ftesë të tillë në të ardhmen, “nëse kushtet do ta lejonin”.
Më herët gjatë vitit, Merz kishte deklaruar se nëse do të ftonte Netanyahu-n në Gjermani, ai nuk do të arrestohej në tokën gjermane.
Lini një Përgjigje