FLASH
Shkruar nga Pamfleti
Donald Trump u ka ribërë thirrje aleatëve evropianë se në lidhje me Groenlandën, Shtetet e Bashkuara nuk do të tërhiqen kurrë nga qëllimet e tyre.
Këtë mesazh e përforcoi Sekretari i Thesarit, Scott Bessent, i cili tha se Evropa është “shumë e dobët” për të garantuar sigurinë e saj.
Gjatë një interviste për “NBC News”, Bessent minimizoi kërcënimet e Bashkimit Evropian për të anuluar marrëveshjen tregtare me administratën Trump, duke theksuar se presidenti po e përdor këtë marrëveshje si strategji për të arritur qëllimet e tij.
Bessent u shpreh se marrëveshja tregtare ende nuk është finalizuar, duke sugjeruar se presidenti amerikan po vepron me fuqitë emergjente për të realizuar qëllimet.
Të shtunën, Trump njoftoi vendosjen e tarifave prej 10% për produkte nga tetë vende evropiane, me një rritje të mundshme në 25% nëse nuk arrihet një marrëveshje për blerjen e Groenlandës. Kjo masë shkaktoi reagime të ashpra, duke përfshirë kritikat e Presidentit francez Emmanuel Macron, i cili e quajti si “të papranueshëm”.
Bessent shpjegoi kërkesën për Groenlandën në kontekstin e konkurrencës gjeopolitike në Arktik dhe planit të Trump për të vendosur mburojën raketore “Kupola e Artë”. Ai përmendi gjithashtu varësinë e mëparshme të Evropës nga Rusia, duke theksuar se kjo ka ndikuar në politikën e sigurisë.
Duke folur për taktikën e Trump ndaj Evropës, Bessent tha se presidenti nuk ka ndërmend të ndryshojë qëndrimin dhe shtoi se Shtetet e Bashkuara e demonstrojnë forcën ndërsa evropianët tregojnë dobësi. Ai theksoi se, në kuptimin e sigurisë, Groenlanda duhet të jetë pjesë e Shteteve të Bashkuara.
Për shqetësimet e udhëheqësve evropianë se blerja e Groenlandës mund të çojë në shpërbërjen e NATO-s, Bessent e përshkroi këtë dilemë si “të rreme”, duke thënë se liderët evropianë do të kuptojnë se kanë nevojë për ombrellën e sigurisë së Shteteve të Bashkuara.
Lini një Përgjigje