FLASH
Shkruar nga Pamfleti
Një problem në një nga motorët detyroi anulimin e fluturimit nga Tenerife; Mbreti Felipe vuri në dispozicion avionin e tij privat për kthimin e Papës në Vatikan.
Papa Leoni XIV do të kthehet në Romë me avionin privat të Mbretit Felipe VI të Spanjës, pasi avioni që duhej ta transportonte nga Tenerife pësoi një problem teknik para ngritjes.
Pas më shumë se një ore pritjeje në bord, Papa u detyrua të zbriste nga avioni. Mbreti Felipe, i cili e kishte përshëndetur pak më herët, e shoqëroi më pas në sallën VIP të aeroportit.
Komandanti i avionit njoftoi pasagjerët se ishte konstatuar një problem në një nga sistemet e mjetit fluturues. Sipas tij, ekipet teknike po përpiqeshin të zgjidhnin defektin.
Problemi u shfaq në momentin kur avioni po përgatitej të ndizte motorët dhe të lëvizte drejt pistës së ngritjes. Burime në bord bënë të ditur se pilotët vunë re se një nga motorët nuk po funksiononte sipas parametrave të parashikuar.
Në një njoftim të mëvonshëm, komandanti shpjegoi se ekipi i mirëmbajtjes kishte sugjeruar tërheqjen e avionit në një pozicion të orientuar përballë erës për të tentuar një rinisje të motorit. Sipas tij, defekti mund të ishte shkaktuar nga një erë e lehtë nga pas.
Fluturimi IB1477 i kompanisë Iberia, me Papën, stafin e tij dhe gazetarët që e shoqëronin, ishte planifikuar të nisej në orën 15:20 sipas kohës lokale dhe të mbërrinte në aeroportin Fiumicino të Romës pas më shumë se katër orësh udhëtim.
Një zëdhënëse e Iberia-s deklaroi për Corriere della Sera se avioni kishte pësuar një problem teknik që nuk mund të riparohej menjëherë. Ajo sqaroi se të gjithë pasagjerët u zbritën nga avioni dhe se një mjet zëvendësues ishte nisur nga Madridi për të kryer fluturimin gjatë së njëjtës ditë.
Nga Vatikani u bë e ditur se Papa Leoni XIV do të udhëtojë drejt Romës me avionin e ofruar nga Mbreti i Spanjës. Nisja pritet të bëhet rreth orës 18:00 sipas kohës lokale, ndërsa mbërritja në Romë parashikohet rreth orës 23:00 sipas kohës italiane.
Ndërkohë, personeli i Selisë së Shenjtë dhe gazetarët e fluturimit papnor do të kthehen në orët në vijim me një avion tjetër të vënë në dispozicion nga kompania Iberia.
Lini një Përgjigje