FLASH
Shkruar nga Pamfleti
Ambasadori britanik Neil Holland i ka bërë sërish thirrje Beogradit zyrtar për lirimin e menjëhershëm të tre policëve të Kosovës, që u rrëmbyen në 14 qershor nga forcat speciale serbe në brendësi të territorit të Republikës së Kosovës.
Holland shprehet se Kosova dhe Serbia duhet të ulin menjëherë tensionet mes tyre.
“Britania e Madhe është shumë e vetëdijshme për rritjen e fundit të tensioneve ndërmjet Serbisë dhe Kosovës. Mbretëria e Bashkuar bën thirrje për lirimin e menjëhershëm të tre policëve të Kosovës të ndaluar më 14 qershor. Qeveritë e Serbisë dhe Kosovës duhet të ushtrojnë përmbajtje maksimale, të shmangin veprimet e njëanshme dhe të ndërmarrin hapa drejt qetësimit të tensioneve”, tha Holland.
Më tej, ambasadori shtoi se Britania e Madhe i ka përsëritur thirrjet ndaj qeverisë së Kosovës që të sigurojë që kryetarët e zgjedhur të komunave t’i kryejnë detyrat e tyre nga vendet alternative dhe njësitë e Policisë Speciale të tërhiqen nga afërsia e ndërtesave komunale.
Po ashtu, Holland deklaroi se Britania e Madhe kërkon që zgjedhjet e reja duhet të shpallen sa më shpejt të jetë e mundur në të cilat inkurajojnë serbët e Kosovës të marrin pjesë.
“Ne presim që Kosova dhe Serbia të riangazhohen në mënyrë konstruktive në dialogun e lehtësuar nga BE-ja dhe në veçanti të fillojnë punën pa vonesa të mëtejshme për themelimin e Asociacionit të Komunave me Shumicë Serbe”, përfundoi ambasadori britanik, Neil Holland.
Lini një Përgjigje