FLASH
Shkruar nga PamfletiDisa vende prodhuese si Iraku, Emiratet e Bashkuara Arabe dhe Kuvajti kanë ulur prodhimin, pasi transporti i naftës është bërë më i vështirë për shkak të situatës në rajon.
Çmimet globale të naftës kanë kaluar nivelin e 100 dollarëve për fuçi për herë të parë që nga viti 2022, për shkak të sulmeve të përbashkëta të Shteteve të Bashkuara të Amerikës dhe Izraelit ndaj Iranit.
Iranianët përshkruan skena katastrofe pas bombardimit të depove të naftës në Teheran
me banorët që raportojnë terrorin e qytetit të mbushur me tym, nga shiu, ajri dhe uji potencialisht toksik deri te mungesa e ushqimit dhe vështirësia e arratisjes. Tymi i zi i dendur ende ngrihej në qiell, bloza mbulonte rrugët dhe makinat, ballkonet ishin të mbushura me mbeturina të zeza dhe ajri toksik kishte mbushur mushkëritë ndërsa Teherani u zgjua pas një nate sulmesh ajrore në depot e naftës së qytetit.
Katër depo nafte dhe një vend logjistik i naftës në dhe përreth Teheranit u goditën. Autoritetet lokale thanë se gjashtë persona u vranë dhe 20 u plagosën në një nga vendet.
Ndërkohë çmimi ndërkombëtar i referencës së naftës së papërpunuar Brent crude, u rrit me më shumë se 20% gjatë fundjavës, duke arritur deri në 114 dollarë për fuçi. Mëngjesin e së hënës çmimi u stabilizua rreth 107.50 dollarë për fuçi, ndërsa tregjet vazhdojnë të reagojnë ndaj frikës për ndërprerje të furnizimeve globale me energji. Edhe çmimi i naftës amerikane West Texas Intermediate u rrit ndjeshëm, duke arritur mbi 112 dollarë për fuçi.
Rritja e çmimeve lidhet kryesisht me tensionet në Ngushticën e Hormuzit, një nga rrugët detare më të rëndësishme për transportin e naftës në botë. Irani ka bllokuar në mënyrë efektive lëvizjen e anijeve në këtë zonë në shenjë hakmarrjeje, duke rrezikuar rreth një të pestën e furnizimit global me naftë.
Disa vende prodhuese si Iraku, Emiratet e Bashkuara Arabe dhe Kuvajti kanë ulur prodhimin, pasi transporti i naftës është bërë më i vështirë për shkak të situatës në rajon.
Presidenti amerikan Donald Trump e cilësoi rritjen e çmimeve si një efekt të përkohshëm të konfliktit, duke theksuar se situata do të stabilizohet pasi të eliminohet, sipas tij, kërcënimi bërthamor i Iranit.
“Çmimet afatshkurtra të naftës, të cilat do të bien me shpejtësi kur të mbarojë shkatërrimi i kërcënimit bërthamor të Iranit, janë një çmim shumë i vogël për t’u paguar për SHBA-në, botën, sigurinë dhe paqen”, tha Trump në një postim në Truth Social.
Edhe Sekretari amerikan i Energjisë, Chris Wright, deklaroi se çdo rritje e çmimeve të karburantit në tregjet ndërkombëtare pritet të jetë afatshkurtër.
Megjithatë, tregjet financiare në të gjithë Azinë mbeten nën presion.
Sulmet e Iranit ndaj fqinjëve
Irani ka goditur rafinerinë më të madhe të Bahreinit sot në mëngjes.
Ushtria izraelite po përgatitet për një luftë njëmujore, sipas mediave izraelite.
Rritja e ndjeshme e çmimeve të naftës dhe përshkallëzimi i luftës midis Shteteve të Bashkuara, Izraelit dhe Iranit po shkaktojnë tronditje të forta në tregjet globale. Me Brent që i afrohej më herët 120 dollarëve për fuçi dhe Ngushticën e Hormuzit që u mbyll praktikisht, investitorët dhe qeveritë po përballen me një valë të re presioni energjitik dhe inflacionist.
Çmimi i naftës së papërpunuar amerikane WTI është rritur me 30% dhe ai i Brent me 27%, me të dy standardet që tani tejkalojnë 116 dollarë për fuçi, pasi tregjet janë përfshirë nga paniku për vazhdimin e luftës në Lindjen e Mesme dhe mbylljen de facto të Ngushticës së Hormuzit.
Tregjet ndërkombëtare të aksioneve regjistruan humbje të forta, dollari u forcua, ndërsa rendimentet e obligacioneve u rritën, në një mjedis pasigurie të fortë gjeopolitike që të kujton periudhat më të trazuara të viteve të fundit.
Lini një Përgjigje