FLASH
Shkruar nga Pamfleti
Bashkimi Evropian ka nisur të kufizojë aksesin e Hungarisë në informacione sensitive dhe të organizojë takime diplomatike në formate më të vogla, mes shqetësimeve për rrjedhje të mundshme të të dhënave drejt Rusisë. Lajmi është raportuar nga Politico, duke iu referuar disa diplomatëve dhe zyrtarëve evropianë.
Zhvillimi vjen pas deklaratave të kryeministrit polak Donald Tusk, i cili ka shprehur dyshime të kahershme për lidhjet e qeverisë së Viktor Orbán me Moskën. Në një reagim në platformën X, Tusk deklaroi se pretendimet për përcjellje informacioni nga bashkëpunëtorë të Orbán drejt Rusisë “nuk duhet të habisin askënd”.
Sipas burimeve të Politico, Bashkimi Evropian nuk pritet të ndërmarrë një reagim zyrtar në këtë fazë, për të shmangur ndikimin e mundshëm në zgjedhjet hungareze të 12 prillit. Megjithatë, shqetësimet për sigurinë e informacionit mbeten të larta.
Një raport i The Washington Post thekson se qeveria hungareze ka ruajtur kontakte të afërta me Rusinë gjatë luftës në Ukrainë. Sipas këtij burimi, ministri i Jashtëm Péter Szijjártó dyshohet se ka përdorur ndërprerjet gjatë takimeve ndërkombëtare për të komunikuar me homologun rus Sergey Lavrov. Këto pretendime mbeten të pakonfirmuara zyrtarisht.
Si pasojë, disa shtete anëtare kanë rritur përdorimin e formateve më të vogla bashkëpunimi, duke shmangur diskutimet në nivelin e plotë të 27 vendeve. Një zyrtar evropian e lidhi këtë prirje me forcimin e mekanizmave si E3, E4, E7, E8, formati i Vajmarit, NB8 dhe JEF.
Formati i Vajmarit përfshin Francën, Gjermaninë dhe Poloninë, ndërsa NB8 përbëhet nga tetë vende të Evropës Veriore dhe Baltike. JEF është një forcë ekspedicionare e përbashkët e dhjetë vendeve të Evropës Veriore.
Ish-ministri i Jashtëm i Lituanisë, Gabrielius Landsbergis, deklaroi për Politico se paralajmërime për rrjedhje të mundshme informacioni nga pala hungareze ekzistonin që në vitin 2024. Ai shtoi se disa zyrtarë evropianë kufizonin informacionin që ndanin në prani të ministrit Szijjártó. Sipas tij, masa të ngjashme u morën edhe përpara samitit të NATO-s në Vilnius në vitin 2023.
Në këtë kontekst, edhe grupi i vendeve të krahut lindor të NATO-s, i njohur si “Nëntëshi i Bukureshtit”, ka shqyrtuar mundësinë e përjashtimit të Hungarisë për shkak të mosmarrëveshjeve lidhur me mbështetjen për Ukrainën.
Nga ana tjetër, autoritetet hungareze i kanë hedhur poshtë këto raportime. Ministri për Çështjet Evropiane, János Bóka, i cilësoi ato si “fake news”, ndërsa Péter Szijjártó akuzoi mediat për përhapje të “teorive konspirative”.
Burime diplomatike në BE nuk përjashtojnë masa të mëtejshme, përfshirë klasifikimin më të rreptë të dokumenteve dhe kufizimin e aksesit në informacion, si pjesë e përpjekjeve për të parandaluar rrjedhjet dhe për të forcuar sigurinë institucionale.
Lini një Përgjigje