FLASH
Shkruar nga Pamfleti
Shefi i diplomacisë së Bashkimi Evropian, Josep Borrell ka reaguar ashpër ndaj deklaratës së Trump ndaj vendeve të Natos. Borrell tha se NATO nuk është një Aleancë ku çdokush mund të zgjedhë sipas dëshirës.
“NATO nuk mund të jetë një aleancë a la carte ku ke mundësi zgjedhjeje sipas dëshirës nga një meny”, tha Borrell.
Deklaratat e Trumpit nxitën reagime në aleatët evropianë të Shteteve të Bashkuara. Ish-presidenti amerikan tha se ai do të “inkurajojë” Rusinë që të sulmojë çdo shtet të NATO-s që nuk përmbush obligimet e tij financiare ndaj aleancës.
“Të bëhemi serioz. NATO nuk mund të jetë një aleancë ushtarake a la carte, nuk mund të jetë një aleancë ushtarake që punon sipas tekave të përditshme të presidentit amerikan”, tha Borrell.
“Ose ekziston ose jo”, tha ai, duke shtuar se nuk do të komentojë më “asnjë budallallëk” që do të dalë nga fushata zgjedhore presidenciale amerikane.
Deklaratat e Trumpit – i cili kur ishte në pushtet e tërhoqi SHBA-në nga marrëveshja bërthamore me Iranin dhe nga marrëveshja për klimën e Parisit – nxiti reagimin e presidentit aktual, Joe Boden.
Biden tha se deklaratat e paraardhësit të tij ishin “të tmerrshme dhe të rrezikshme”.
Shefi i NATO-s, Jens Stoltenberg, më 11 shkurt paralajmëroi se “çdo sugjerim që aleatët nuk do të mbrojnë njëri-tjetrin minon të gjithë sigurinë tonë, përshirë edhe të SHBA-së”.
Trump, 77 vjeç, konsiderohet kandidati kyç për fitimin e nominimit për garën presidenciale nga republikanët, duke rritur gjasat për një përballje në zgjedhje me presidentin demokrat, Joe Biden. /REL
Lini një Përgjigje