FLASH
Shkruar nga Pamfleti
Nisin negociatat me shtetet anëtare; nuk priten ndryshime të menjëhershme në terren
Parlamenti Evropian ka miratuar qëndrimin e tij mbi rregulloren e re për kthimin e migrantëve, duke e çuar procesin në fazën vendimtare të negociatave me shtetet anëtare të Bashkimit Evropian. Votimi përcakton linjat kryesore mbi afatet e kthimeve, ndalimin, përdorimin e qendrave jashtë BE-së (“return hubs”) dhe kushtet për transferimet drejt vendeve të treta.
Sipas procedurës legjislative, në ditët në vijim nisin trilogët, negociata informale mes Parlamentit, Këshillit dhe Komisionit Evropian, për të arritur një kompromis mbi tekstin përfundimtar. Këshilli, që përfaqëson qeveritë e 27 vendeve anëtare, ka një qasje më kufizuese se direktiva aktuale, duke favorizuar procedura më të shpejta dhe përdorim më të gjerë të ndalimit. Diskutimet pritet të fokusohen te garancitë procedurale, kontrolli gjyqësor dhe kufijtë e bashkëpunimit me vendet e treta.
Edhe nëse arrihet marrëveshje, rregullorja duhet të miratohet përfundimisht nga Parlamenti dhe Këshilli përpara se të hyjë në fuqi, pas një periudhe tranzitore që zakonisht zgjat nga disa muaj deri në disa vite. Kjo do të thotë se në afat të shkurtër nuk priten ndryshime konkrete në praktikë.
Aktualisht, për migrantët që ndodhen në territorin e BE-së vazhdojnë të zbatohen rregullat ekzistuese të direktivës së vitit 2008 dhe legjislacionet kombëtare. Po ashtu, krijimi i qendrave të kthimit jashtë BE-së kërkon jo vetëm miratimin përfundimtar të rregullores, por edhe marrëveshje konkrete me vendet partnere, të cilat duhet të respektojnë standardet ndërkombëtare të të drejtave të njeriut, përfshirë parimin e moskthimit me forcë.
Megjithatë, votimi në Strasburg jep një sinjal politik të qartë për forcimin e bashkëpunimit në nivel evropian. Komisioni dhe qeveritë pritet të intensifikojnë marrëveshjet e ripranimit dhe të zhvillojnë një sistem të përbashkët për menaxhimin e kthimeve, me një rol më të madh për agjencinë Frontex dhe Koordinatorin Evropian për Kthimet.
Çështjet më të debatueshme mbeten kriteret për përcaktimin e “vendeve të treta të sigurta”, kohëzgjatja maksimale e ndalimit dhe mekanizmat e monitorimit të pavarur të qendrave të ndalimit dhe strukturave të ardhshme jashtë BE-së. Sipas analizave institucionale, disa dispozita mund të sfidohen në Gjykatën e Drejtësisë së BE-së pas miratimit, çka mund të çojë në rishikime të mëtejshme të rregullores.
Lini një Përgjigje