FLASH
Shkruar nga Pamfleti
Ngërç në bisedimet SHBA–Iran, mungon marrëveshja për çështjen bërthamore
Negociatat mes Shteteve të Bashkuara dhe Iranit përfunduan pa marrëveshje pas 21 orësh bisedimesh intensive, duke lënë pezull përpjekjet diplomatike për një zgjidhje mbi programin bërthamor dhe sigurinë në Lindjen e Mesme.
Zëvendëspresidenti i SHBA-së, J.D. Vance, konfirmoi se delegacioni amerikan po kthehet në Uashington pa rezultat konkret, duke theksuar se, pavarësisht përpjekjeve të gjata, pala iraniane nuk pranoi kushtet e propozuara nga Uashingtoni.
“Komunikuam vazhdimisht me presidentin. Nuk e di sa herë folëm me të, ndoshta gjashtë apo edhe dymbëdhjetë herë gjatë 21 orëve të fundit,” deklaroi Vance, duke nënvizuar përfshirjen direkte të presidentit Donald Trump në procesin negociator.
Ai shtoi se SHBA mori pjesë në bisedime me qasje konstruktive dhe në mirëbesim. “Negociuam me mirëbesim. Po largohemi duke paraqitur një propozim shumë të thjeshtë, ofertën tonë përfundimtare dhe më të mirë. Do të shohim nëse iranianët do ta pranojnë,” u shpreh ai.
Sipas Vance, gjatë diskutimeve u trajtuan një sërë çështjesh kyçe, por nuk u arrit kompromis mbi pikat themelore. “Thjesht nuk arritëm në një pikë ku iranianët ishin të gatshëm të pranonin kushtet tona. Besoj se kemi qenë fleksibël dhe të gatshëm për kompromis,” tha ai.
Zëvendëspresidenti theksoi se objektivi kryesor i Uashingtonit mbetet i pandryshuar: parandalimi i pajisjes së Iranit me armë bërthamore. “Duhet të shohim një angazhim të qartë që nuk do të kërkojnë armë bërthamore dhe as kapacitetet për t’i zhvilluar ato shpejt. Ky është qëllimi kryesor i presidentit,” deklaroi Vance.
Ai shtoi se shqetësimi i SHBA-së nuk lidhet vetëm me situatën aktuale, por me perspektivën afatgjatë. “Pyetja thelbësore është nëse ekziston një vullnet real nga Irani që të mos zhvillojë armë bërthamore, jo vetëm tani apo pas dy vitesh, por në mënyrë të qëndrueshme. Këtë ende nuk e kemi parë,” përfundoi ai.
Nga ana tjetër, reagimi i Iranit ishte kritik ndaj qëndrimit amerikan. Një zëdhënës i Ministrisë së Jashtme iraniane deklaroi se suksesi i negociatave varet nga heqja dorë e SHBA-së nga kërkesat që Teherani i cilëson si “të tepruara dhe të paligjshme”.
Burime pranë delegacionit iranian, të cituara nga agjencitë Fars dhe Tasnim, pohuan se Uashingtoni ka kërkuar në tryezën e negociatave përfitime që nuk i arriti në përballjet e mëparshme, duke përfshirë çështje që lidhen me Ngushticën e Hormuzit dhe programin bërthamor civil.
Sipas këtyre burimeve, Irani ka paraqitur propozime që i konsideron të arsyeshme dhe nuk është nën presion për të arritur një marrëveshje të shpejtë. Teherani thekson se “topi është në fushën e SHBA-së” dhe kërkon një qasje më realiste nga pala amerikane.
Negociatat u zhvilluan në Islamabad, në një përpjekje për të ulur tensionet dhe për të arritur një marrëveshje më të gjerë për stabilitetin rajonal. Megjithatë, mungesa e progresit tregon hendekun e thellë mes dy vendeve mbi çështjet strategjike.
Deri tani, nuk është njoftuar një datë për raundin e ardhshëm të bisedimeve, ndërsa të dyja palët mbeten në qëndrimet e tyre aktuale.
Lini një Përgjigje