FLASH
Shkruar nga Pamfleti
Një shtrat për emigrantët në Gjadër kushton më shumë se një apartament i madh në një qytet mesatar italian: mbi 153 mijë euro për person.
Ky është zbulimi i platformës “Trattenuti”, realizuar nga ActionAid në bashkëpunim me Departamentin e Shkencave Politike të Universitetit të Barit, që për herë të parë bën publike të dhëna të plota mbi kostot e ndalimit administrativ në Itali dhe në qendrat shqiptare.
Në qendrën e Gjadrit, deri në mars 2025 janë ndërtuar 400 vende, ndërsa për këtë projekt dhe strukturën ndihmëse në Shëngjin janë nënshkruar kontrata me vlerë 74,2 milionë euro, shpesh me procedura të drejtpërdrejta. Rezultati: një shtrat aktiv ka kushtuar mbi 153.000 euro.
“Operacioni Shqipëri është instrumenti më i kushtueshëm, çnjerëzor dhe i kotë në historinë e politikave të migracionit italian”, denoncon ActionAid, duke sjellë shembullin ekstrem të fundit të vitit 2024, kur Prefektura e Romës pagoi 570 mijë euro për vetëm pesë ditë aktivitet të qendrave, me një kosto prej 114 mijë euro në ditë për të mbajtur 20 persona, të cilët u liruan të gjithë brenda pak orësh.
Në të njëjtën kohë, sistemi i ndalimit administrativ funksionon vetëm në 46% të kapacitetit, ndërsa protesta, vonesa dhe dëmtime kanë lënë 263 vende bosh nga 1164 efektive.
Megjithëse zyrtarisht këto qendra kanë si qëllim lehtësimin e procesit të deportimit, shifrat flasin të kundërtën: në 2024, nga 6.164 persona të futur në qendra, vetëm 2.576 u deportuan – 41,8%, niveli më i ulët që nga viti 2014. Nga Cpr-të italiane u deportua vetëm 10,4% e atyre me urdhër dëbimi.
Alarmante është edhe rritja e azilkërkuesve të ndaluar, që përbëjnë mbi 45% të të gjithë të ndaluarve në 2024. Një e pesta e tyre nuk kishte marrë ende vendim për largim, por ishte mbyllur vetëm për shkak të aplikimit për azil.
“Përdorimi i ndalimit si instrument i politikës së azilit është një ndryshim paradigme, që vë në pikëpyetje objektivat e një mjeti kaq agresiv ndaj të drejtave themelore”, paralajmëron Giuseppe Campesi, profesor në Universitetin e Barit.
Gjyqësori italian ka filluar të reagojë: lirimet për mungesë konfirmimi ose zgjatjeje janë rritur nga 9% në vitin 2021 në 29% në vitin 2024. Vetëm në dy vitet e fundit, 186 persona janë liruar për ndalim të paligjshëm, mes tyre 89% azilkërkues në qendrat e reja Ctra.
Lini një Përgjigje