FLASH
Shkruar nga Pamfleti
Lexues të “Pamfleti”, ju ftojmë të ndiqni edicionin informativ të mesditës, ku mes të tjerash veçojmë:
Protesta e PD jashtë Kuvendit- Xhamia e Namazgjasë me kordon të dyfishtë sigurie
Xhamia e Namazgjasë është vendosur nën një kordon sigurie. Siç shihet edhe nga pamjet, objekti fetar është rrethuar me barriera metalike, ndërsa pas tyre janë pozicionuar edhe efektivë të policisë.
Masat e shtuara të sigurisë vijnë pas incidentit të fundit, kur gjatë protestës së Partisë Demokratike u hodhën molotovë në drejtim të zonës, pa kursyer as xhaminë.
Në atë moment, brenda saj ndodheshin besimtarë që po kryenin ritet fetare, duke qenë se aktualisht është edhe muaji i Ramazanit.
Kuvendi do të vendosë sot lidhur me kërkesën e SPAK për arrestimin e Belinda Ballukut, ish-zv.Kryeministres dhe ish-ministres së Infrastrukturës. Këshilli për Mandatet dhe Imunitetet do të paraqitet me dy raporte, krejtësisht të kundërt, sa i takon qëndrimit lidhur me kërkesën e SPAK.
Ky i fundit ka kërkuar në Kuvend autorizimin për vendosjen e një mase sigurie me arrest ndaj ish-zv.Kryeministres, e cila fillimisht u pezullua nga funksionet qeveritare dhe më pas u shkarkua nga Kryeministri Edi Rama, pasi edhe Gjykata Kushtetuese la në fuqi një vendim të GJKKO-së për pezullimin e saj si ministre.
Ndërkohë opozita ka thirrur një protestë para Kuvendit, çka ka bërë që Parlamenti të zhvillojë punimet nën masa të forta sigurie. Jo vetëm barriera metalike dhe punonjës policie, por edhe një perimetër sigurie është vendosur nga Garda e Republikës. Kjo e fundit madje ka vendosur në tarracën e godinës efektivë që do të vëzhgojnë nga lart çdo lëvizje të protestuesve.
Seanca për Ballukun- Rama braktis sallën e Kuvendit
Kryeministri Edi Rama është larguar nga salla e Kuvendit, atje ku ka nisur seanca plenare ku do të vendoset lidhur me kërkesën e SPAK-ut për Belinda Ballukun, ish-zv.Kryeministren dhe ish-ministren e Infrastrukturës.
Rama, i cili mbërriti në Kuvend rreth orës 09:20, nuk ka qëndruar më shumë se 1 orë, duke u larguar në momentin që deputeti Oerd Bylykbashi ka lexuar raportin në emër të 5 anëtarëve të opozitës në Këshillin e Mandateve dhe Imuniteteve.
Në seancë mungojnë edhe deputetët Fatmir Xhafaj dhe Elisa Spiropali, ndërkohë që edhe Belinda Balluku, nuk ka preferuar të jetë e pranishme në seancë.
Më herët, Grupi Parlamentar i PS-së ka vendosur që të mos miratojë kërkesën e SPAK për t’i dhënë autorizimin për arrestimin e Ballukut.
Monika Kryemadhi shkon në GJKKO- Batuta me gazetarët: Ditë super, mos harroni filmin!
Ish-deputetja Monika Kryemadhi u paraqit paraditen e sotme në Gjykatën e Posaçme kundër Korrupsionit dhe Krimit të Organizuar (GJKKO), ku po zhvillohet seanca e radhës në procesin penal ku ajo dhe ish-bashkëshorti Ilir Meta, janë marrë të pandehur.
Para se të hynte në godinën e gjykatës, Kryemadhi komunikoi shkurt me gazetarët, duke bërë edhe një koment me humor për aktivitetet e ditës.
“Sot është ditë super… gjyqi ynë, imuniteti i Belindës, protesta e opozitës, filmi im pasdite…”, u shpreh ajo.
Ajo kujtoi gjithashtu se në orën 18:00 do të shfaqej filmi i saj dhe u bëri thirrje gazetarëve të mos e harronin.
Në ambientet e gjykatës ishte i pranishëm edhe avokati i Ilir Metës, Kujtim Cakrani, i cili para hyrjes në godinë deklaroi se “sot ka ngjarje të mira në këtë seancë”.
Gjermania 'i vë vijën e kuqe' Tiranës- Pa hetuar ministrat për korrupsion, Shqipëria nuk kalon testin e BE-së
Zgjerimi është rikthyer si një përparësi kryesore në axhendën e Bashkimit Evropian.
“Anëtarësimi i shteteve të reja anëtare në vitet e ardhshme është një perspektivë realiste”, tha Komisionerja Evropiane për Zgjerimin, Marta Kos, para një audience kur vizitoi Këshillin Gjerman për Marrëdhëniet me Jashtë më 4 mars, por paralajmëroi se “edhe BE-ja duhet të përgatitet.”
Debati për zgjerimin e Bashkimit Evropian rikthen në fokus edhe pozicionin e Shqipërisë në procesin e negociatave. Analiza të publikuara në qarqe politike gjermane theksojnë se progresi i vendit mbetet i kushtëzuar nga një raport kyç i Komisionit Evropian dhe nga mënyra si institucionet shqiptare trajtojnë korrupsionin në nivelet e larta të qeverisjes.
Sipas Këshillit Gjerman për Marrëdhëniet me Jashtë, Shqipëria do të vazhdojë të konsiderohet nën një prag kritik deri në momentin kur të marrë një Raport Vlerësimi të Përkohshëm të Standardeve (IBAR) pozitiv nga Komisioni Evropian.
Ky raport përbën një hap formal për të kaluar në fazën e mbylljes së kapitujve të negociatave.
Për më shumë, klikoni linkun e lajmeve të orës 12.00
Lini një Përgjigje