FLASH
Shkruar nga Pamfleti
Prokuroria del me njoftim zyrtar për vdekjen e të miturit...
Vdekja e tmerrshme e 3-vjeçarit Brian Spahiu pas një ndërhyrjeje dentare në Tiranë ka çuar në marrjen e masave të para ligjore ndaj mjekëve të përfshirë në këtë ngjarje të rëndë.
Prokuroria e Tiranës ka dhënë masa sigurie për pesë persona, të dyshuar për "vrasje nga pakujdesia", "mashtrim në bashkëpunim" dhe "shpërdorim detyre", ndërsa dy mjekë të tjerë janë marrë në hetim për neglizhencë në trajtimin mjekësor.
Në qendër të hetimit është ndërhyrja dentare që iu bë të miturit më 28 shtator 2023, në klinikën private "Splendent", ku ai iu nënshtrua një trajtimi agresiv në 14 dhëmbë, nën anestezi të përgjithshme për rreth 5 orë. Vetëm pak orë pas ndërhyrjes, fëmija ra në gjendje kome dhe u shtrua në QSUT, ku ndërroi jetë më 1 tetor. Ekspertiza italiane e kryer me kërkesë të Prokurorisë shqiptare ka konfirmuar se ndërhyrja dentare ishte tej mase e zgjeruar dhe jashtë çdo protokolli të lejuar për një fëmijë të kësaj moshe. Për më tepër, ai nuk kishte marrë diagnozë të saktë, as nuk ishin bërë testet e domosdoshme para operacionit.
Mjekët përgjegjës, Roland Xhaxho dhe vajza e tij Ina Xhaxho, përballen me akuza të rënda, ndërsa ndaj tyre dhe bashkëpunëtores Marta Gina është vendosur masa e arrestit në shtëpi, edhe pse prokuroria kërkoi "arrest në burg". Gjykata ka refuzuar arrestimin e tyre.
Shkelje të rënda janë konstatuar edhe në autopsinë dhe ekspertizën fillestare nga Instituti i Mjekësisë Ligjore, si dhe në trajtimin post-ndërhyrje të bërë nga reanimatorët e Pediatrisë në QSUT. Kjo ka çuar në hetimin e dy mjekëve të tjerë, V.H. dhe D.S., për neglizhencë mjekësore.
Rasti i Brian Spahiut ka ekspozuar një spirale të frikshme neglizhence, papërgjegjshmërie dhe, sipas Prokurorisë, edhe mashtrimi të qëllimshëm në sistemin shëndetësor publik dhe privat. Janë shkelur jo vetëm protokollet mjekësore, por edhe vetë parimet minimale të kujdesit për jetën njerëzore, sidomos kur bëhet fjalë për një fëmijë 3-vjeçar. Rasti kërkon përgjegjësi penale dhe institucionale, dhe nuk mund të mbulohet me heshtje apo vendime gjykatash të buta.
Njoftimi i prokurorisë
Prokuroria pranë Gjykatës së Shkallës së Parë të Juridiksionit të Përgjithshëm, Tiranë, ka dhënë masa sigurie për pesë persona për veprat penale ‘Vrasja nga pakujdesia’, ‘Mashtrimi në bashkëpunim’ e ‘Shpërdorim detyre’ në kuadër të hetimeve mbi rastin e vdekjes së një të mituri, 3-vjeçar pas një ndërhyrje dentare në një klinikë në kryeqytet. Prokuroria në vijim të hetimeve të nisura mbi procedimin penal nr.6477, datë 05.10.2023, ka marë si persona në hetim shtetasit:
1 – R. Xh., për kryerjen e veprës penale “Vrasje nga pakujdesia”, parashikuar nga neni 85 i K.Penal si dhe për veprën penale të parashikuar nga neni 180/a i Kodit Penal. Mbi bazën e kërkesës së prokurorit, gjykata vendosi masën e sigurimit “Arrestit në shtëpi”, të parashikuar nga neni 237 i Kodit të Procedurës Penale;
2 – I.Xh., e dyshuar për kryerjen e veprës penale “Vrasje nga pakujdesia”, parashikuar nga neni 85 i K.Penal dhe “Mashtrim”, kryer në bashkëpunim, parashikuar nga neni 143/2 i K.Penal;
3- M. G., e dyshuar për kryerjen e veprës penale “Vrasje nga pakujdesia”, parashikuar nga neni 85 i K.Penal dhe “Mashtrim”, kryer në bashkëpunim, parashikuar nga neni 143/2 i K.Penal;
4 – E.S., i dyshuar për kryerjen e veprës penale “Shpërdorimi i detyrës”, kryer në bashkëpunim, parashikuar nga nenet 248 dhe 25 i K.Penal; dhe
5 – E. A, i dyshuar për kryerjen e veprës penale “Shpërdorimi i detyrës”, kryer në bashkëpunim, parashikuar nga nenet 248 dhe 25 i K.Penal.
Nga ana e prokurorit u kërkua masa e sigurimit ‘Arrest në burg” për personat nën hetim I. Xh. dhe M. G. ndërsa gjykata ka vendosur masën e sigurimit “Arrest në shtëpi”, të parashikuar nga neni 237 i Kodit të Procedurës Penale.
Në vijim të hetimeve që lidhen me ngjarjen e datës 28.09.2023, kur i miturit B.S, i moshës 3 vjec, i është nënshtruar një ndërhyrje dentare në 14 dhëmbë, tek Klinika “Splendent” drejtuar nga mjekët R.Xh dhe I. Xh. I mituri pas ndërhyrjes kthehet në shtëpi dhe brenda pak orësh dërgohet në gjendje të rëndë shëndetësore (koma dhe insuficencë respiratore akute), në Spitalin e Pediatrisë në Qëndrën Spitalore “Nënë Tereza”, Tiranë, ku dhe më pas në datën 01.10.2023, ka ndërruar jetë.
Për shkak të mangësive dhe konkluzionit të paargumentuar në aktin e ekspertimit mjekoligjor të kryer nga ekspertët e I.M.L.-së, nga ana e prokurorit të çështjes Alma Felaj, për një hetim të plotë, të gjithanshem e objektiv të çështjes penale, në datën 10.12.2023, u vendos kryerja e riekspertimit mjekoligjor dhe ekspertimit mjekoligjor shtesë multidisiplinar me grup ekspertësh. Për këtë qëllim u kërkua ndihmë juridike autoriteteve italiane të drejtësisë, duke kërkuar kryerjen e riekspertimit mjekoligjor dhe ekspertimit mjekoligjor shtesë multidisiplinar me grup ekspertësh në shtetin italian.
Sipas aktit të riekspertimit mjekoligjor dhe ekspertimit mjekoligjor shtesë, nga ana e grupit ekspertëve italianë u arrit në konkluzionin se:
Shoku septik i rëndë, që solli më pas insufiçencën progresive shumëorganore, është shkaku kryesor i vdekjes të pacientit të mitur B. S. Grupi i ekspertëve arriti në përfundimin se gjatë ndërhyrjes dentare dhe procedurës së anestezisë, nga ana e anestezistit dhe stomatologeve që kanë trajtuar të miturin, janë konstatuar shkelje të rënda të protokolleve mjekësore ndërkombëtare dhe praktikave më të mira mjekësore, të cilat kanë një lidhje shkakësore të drejtpërdrejtë me vdekjen e tij. Këto shkelje kanë konstatuar në:
– moszbatimin, moskryerjen e kontrolleve dhe verifikimeve të nevojshme për identifikimin e saktë të gjendjes klinike para operacionit të pacientit; mosformulimin në mënyrë adekuate të diagnozës para operacionit dhe mostrajtimin e duhur profilaktik para operacionit dhe në vazhdim, i mituri iu nënshtrua një procedure kirurgjikale pa u vizituar në mënyrë adekuate, pa një diagnozë të saktë, pa një indikacion të arsyetuar, pa specifikuar alternativat dhe pa kryer testet e nevojshme dhe të detyrueshme për gjendjen klinike të pacientit;
– ndërhyrje e kryer, e cila ishte më e gjerë se sa lejohej për një fëmijë të moshës 3 vjeç dhe induksioni i anestezisë së përgjithshme për një periudhë prej rreth 5 orë, për të trajtuar njëkohësisht shumë dhëmbë, mes të cilëve disa me infeksion të pulpës me rreziqet që lidhen me anestezinë e përgjithshme dhe kontrollin e vështirë të infeksioneve postoperative, evidenton përgjegjësinë për overtreatment
– nxjerrjen plotësisht e papërshtatshme nga spitali i të miturit, duke mos marrë parasysh gjithashtu rreziqet që lidhen me anestezinë dhe patologjitë nga të cilat vuante fëmija, e sidomos arsyet për një kohë të zgjatur zgjimi, pas ndërhyrjes si dhe shenja të tjera klinike.
Grupi i ekspertëve italianë ka konstatuar shkelje të rënda të protokolleve mjekësore në kryerjen e autopsisë dhe ekspertizës mjekoligjore, nga ana e ekspertëve të I.M.L.-së, shtetasit E.S dhe E. A.
Gjithashtu grupi i ekspertëve italiane ka konstatuar shkelje të protokolleve mjekësore nga ana e mjekëve reanimatorë të Pediatrisë, të cilët kanë trajtuar të miturin B.S.
Nisur nga ky fakt, nga ana e organit të akuzës janë marrë si persona nën hetim , shtetasit V. H dhe D. S, me detyrë mjekë në terapinë intensive pranë Pediatrisë në QSUT, të dyshuar për kryerjen e veprës penale “Neglizhenca ne trajtimin mjekësor ” të parashikuar nga neni 96/1 i Kodit Penal.
Perse duhet ti liroje gjykata keta vrases me bluza te bardha? Ju kujtohet filmi italian Mafia me bluza të bardha? Perse gjykata liron vrasesit? Pergjigjen e dini vetë, sepse janë gjykata të "pakorruptuara", dhe se vogelushi i shkrete Brian Spahiu nuk e kishte babain apo nënën politikan, gjyqtar, prokuror, polic... Turp që Gjykata mbron vrasesit, qofshin keta edhe mjeke. Turp per shoqerine shqiptare që nuk reagin ndaj ketyre fenomeneve kriminale. Turp...