FLASH
Shkruar nga Pamfleti
Problematikat në Rrugën e Arbrit vijojnë të shtohen. Pas çarjes së konstatuar pak ditë më parë në tunelin e Murrizit, janë evidentuar dëmtime të reja që rrezikojnë seriozisht sigurinë e qarkullimit.
Në fshatin Plan i Bardhë, në Bashkinë Klos, një segment i rrugës rrezikon të shembet për shkak të çarjes së krijuar në pjesën e poshtme të trupit rrugor. Nga pamjet e publikuara, shihet se dëmtimi shtrihet në një gjatësi prej rreth 100 metrash linearë, ndërsa destabilizimi i bazamentit po ndikon drejtpërdrejt edhe në shtresën e asfaltit, ku kanë nisur të shfaqen shenjat e para të dëmtimit.
Shembja e tokës dhe e murit mbrojtës ka vënë në rrezik të gjithë trupin e rrugës, ndërkohë që, pavarësisht situatës, në zonë nuk është vendosur asnjë sinjalistikë paralajmëruese për drejtuesit e mjeteve. Sipas specialistëve, në disa segmente problematike të Rrugës së Arbrit ka qenë e domosdoshme ndërtimi i pilotëve, për shkak të paqëndrueshmërisë së formacionit të tokës.
Një tjetër shembje është shënuar në afërsi të tunelit të Murrizit, në fshatin Maricë të Tiranës, ku skarpata e rrugës është çarë dhe shembur, duke krijuar rrezik për bllokimin e qarkullimit të automjeteve.
Probleme janë konstatuar gjithashtu edhe me deformimin e asfaltit, kryesisht në segmentin që shtrihet nga tunelet e fshatit Shkallë e Xibrit deri te tuneli i Murrizit, duke ngritur shqetësime për sigurinë e këtij aksi rrugor.
Lini një Përgjigje