FLASH
Shkruar nga Pamfleti
Ministri i Brendshëm, Bledi Çuçi ka pritur ditën e sotme në një takim kreun e INTERPOL, Jürgen Stock, në të parën vizitë të tij në Shqipëri, vizitë e cila përkon edhe me 100 vjetorin e themelimit të kësaj organizate të rëndësishme të bashkëpunimit policor ndërkombëtar.
Çuçi thotë se me të bisedoi me kreun e INTERPOL për luftën kundër krimit të organizuar.
“Ndava me të prioritetet kryesore të Shqipërisë në luftën kundër krimit të organizuar, i cili gjithnjë e më shumë po merr trajta transnacionale dhe në këtë kontekst të ri, bashkërendimi gjithnjë e më i mirë i punës mes të gjitha vendeve është rruga e duhur për ta adresuar këtë problem.”, thotë Çuçi.
Më tej gjatë takimit Ministri i Brendshëm theksoi se sot Policia e Shtetit gëzon një nivel të lartë besimi te partnerët tanë dhe është aktualisht në një fazë të re të bashkëpunimit me këtë organizatë dhe me agjenci të tjera ndërkombëtare duke qenë pjesëmarrëse aktive e me rol drejtues në disa raste në Skuadra të Përbashkëta Hetimore e Operacionale.
Çuçi foli gjithashtu edhe për modernizimin e Policisë së Shtetit.
“E njoha kreun e INTERPOL edhe me hapat që ne kemi nisur të hedhim për modernizimin e Policisë së Shtetit përmes investimeve si asnjëherë më parë në teknologji e pajisje dixhitale.
Ne e çmojmë shumë bashkëpunimin me INTERPOL edhe për sfida të tjera të sigurisë globale si terrorizmi dhe krimi kibernetik”, u shpreh ndër të tjera ministri Çuçi.
Sekretari i Përgjithshëm i Interpolit, Jurgen Stock, gjithashtu zhvilloi edhe një takim me Drejtorin e Përgjithshëm i Policisë së Shtetit, Muhamet Rrumbullaku dhe drejtues të lartë të Policisë së Shtetit.
Sekretari i Përgjithshëm vlerësoi qasjen e Drejtorit të Përgjithshëm në lidhje me reformat në Polici dhe shprehu gatishmërinë për ta ndihmuar Policinë e Shtetit në ato fusha ku është e nevojshme dhe e përshtatshme.
Lini një Përgjigje