FLASH
Shkruar nga Pamfleti
Duke marrë shkas nga aksidenti tragjik në Bërxullë ku humbi jetën një 10-vjeçar, eksperti i sigurisë Fatjon Softa u shpreh se ky fenomen shqetësues është shtuar, sidomos në Tiranë. Softa thotë se kërkohet një kontroll më i madh nga policia rrugore dhe se duhen shtuar masat.
“Ky është një ndër shumë aksidentet që ndodh në këtë vend. Po të shikosh në Tiranë është një problem madhor pasi shpejtësia është e frikshme, sidomos nëpër lagje. Daljet nga pallatet e kthesat rrezikon shumë jetët e moshave të vogla por jo vetëm. Kërkon kontroll të veçantë jo vetëm në gjobë por edhe masa të tjera. Kryqëzimet duhet të jenë të kontrolluara. Sa i takon këtij rasti, ky është problem shqetësues.”- thotë Softa.
Ndër të tjera, Softa ka edhe një sugjerim për pushtetin lokal ku thotë se ka ardhur koha për të bërë kontrollin e territorit dhe duhen vendosur radar.
“Sugjeroj pushtetin lokal dhe ka ardhur koha që për të bërë kontrollin e territorit, të vendosin radar në zonat e banuara. Nuk mjaftojnë tabelat. Është e thjeshtë, radar vertikal. Përfiton edhe të ardhura Bashkia.”- thotë Softa.
Ngjarja e rëndë ndodhi rreth orës 19:00 të së shtunës, në kryqëzimin e Laknasit, ku buzë rrugës ndodhet edhe lokali ku ishte i ulur 10 vjeçari. Sipas informacioneve mësohet se fillimisht u përplasën dy makinat, më pas si pasojë e shpejtësisë njëra ka përfunduar në lokal, ku dhe ka përplasur për vdekje të miturin . Dy drejtuesit e mjeteve njeri Erjon Hajdini 30 dhe tjetri Naim Allmeta 63 vjeç janë nënshtruar ekzaminimeve mjekësore paraprake. Nga analizat, ka rezultuar se 63-vjeçari Allmeta po drejtonte mjetin nën efektin e alkoolit, çka dyshohet se është bërë edhe shkak i ngjarjes.
Lini një Përgjigje