FLASH
Shkruar nga Pamfleti
Stadiumi “Selman Stërmasi” do të ndërtohet plotësisht. Ky është lajmi që vjen ditën e sotme për një nga impiantet që në muajt e fundit nuk ka pritur asnjë ndeshje futbollistike.
Lajmi është bërë i ditur nga sipërmarrësit privatë përmes Koorporatës Shqiptare të Investimeve. Gjithashtu ka qenë drejtoresha e Agjencisë Kombëtare të Planifikimit të Territorit, Adelina Greca, e cila ka njoftuar shpalljen e garës për të marrë pjesë. Gjithçka do të jetë e hapur deri më 24 janar.
“Programi që ne synojmë të vendosim nëpërmjet ideve që do vijnë në konkurrim është në masën 120 mijë metra katrorë. Thirrja për fazën e parë përfundon më 24 Janar. Do të ketë 5 skuadra të përzgjedhura që do marrin edhe çmime, 3 prej tyre do kenë mundësinë të konkurrojnë për të qenë fitues, 3 skuadrat me projektet më të mira dhe në fund do kemi 1 fitues, ai që do të ketë ofertën më të përshtatshme ekonomike”, ka theksuar Greca.
Stadiumi pritet të jetë rreth 50 mijë metra katrorë, teksa kapaciteti pritet të jetë 14.000-16.000 vende. Padiksutim që ky është një lajm i mirë edhe për Tiranën, me bardheblutë që prej mbylljes së “Selman Stërmasit” janë detyruar të “shtegtojnë” në disa qytete të Shqipërisë për të zhvilluar ndeshjet si pritëse./Monitor
Lini një Përgjigje