FLASH
Shkruar nga Pamfleti
Nuk ka dëshirë ta quajë një revansh.
Ardian Ismajli duket qartë se ka një brum prej futbollisti profesionist dhe patrioti të vërtetë, pasi la pas çdo sfidë dhe u kthye më i fortë.
Padyshim, e ka lënë pas faktin që u la në stol dhe nuk luajti asnjë minutë në Evropian.
Goli i shënuar ndaj Ukrainës ishte një konfirmim i kthimit të tij, edhe pse ishte titullar në Ligën e Kombeve, ndoshta sepse munguan Gjimshiti dhe Ajeti.
Sidoqoftë, kur një mbrojtës shënon, e kur për më tepër shpallet lojtari më i mirë i ndeshjes, kjo padyshim që ka një kuptim të madh.
Jo vetëm te Kombëtarja, por Ismajli duket se po arrin kulme edhe tek Empoli.
Në skuadrën toskane jo vetëm që është titullar i padiskutueshëm, dhe po flasim për nivelin e Serisë A, por madje trajneri hera-herës i ka besuar edhe shiritin e kapitenit.
Një vlerësim i lartë dhe plotësisht i merituar.
Është lënë pas sezoni i kaluar, kur mbrojtësi 27-vjeçar pati dëmtime, dhe shpesh humbi ndeshje në Itali.
Sipas të gjitha mundësive, futbollisti nga Kosova do të jetë titullar edhe në sfidën e sotme kundër Gjeorgjisë në “Air Albania”.
Ku i dihet, ndoshta shënon edhe gol, sepse deri më tani ka realizuar tre herë për fanelën “kuqezi”.
Lini një Përgjigje