FLASH
Shkruar nga Pamfleti
Kristian Shpendi vazhdon të bëjë lajm në Itali pasi sezonin fantastik në Serinë C me Çezenën, po e përsërit edhe në këtë edicion në Serinë B. Djaloshi shqiptar po konfirmohet si një golashënues i jashtëzakonshëm dhe vazhdon të mbetet ai më i miri i Serisë B sa i përket rrjetave të tundura në sezonin aktual.
Fitorja 1-0 ndaj Sudtirol erdhi falë golit të tij dhe kështu Shpendi ngjitet në kuotën e 7 golave, duke lënë pas me të paktën dy gola diferencë të gjithë ndjekësit. Një ecuri mbresëlënëse të cilën e ka vlerësuar në konferencën për shtyp edhe trajneri i Çezenës, Mikele Minjani.
“Shpendi është një djalosh i cili ka vlera të dukshme dhe perspektivë të dukshme. Dhuntia e tij më e mirë është përulësia dhe vlerat njerëzore, nga të cilat ai niset. Ka një botë përpara tij, duhet të vazhdojë të punojë duke përdorur karakteristikat e tij në shërbim të skuadrës. Jam i lumtur për të, ashtu si për të gjithë të tjerët në skuadër”, tha ai pas sfidës që ngjiti ekipin e tij në vendin e katërt në renditjen e Serisë B.
Lini një Përgjigje