FLASH
Shkruar nga Pamfleti
Milan ka përmbysur Fiorentinën në një ndeshje plot emocione në “San Siro”, duke fituar 2-1 dhe marrë tre pikë me shumë vlerë në kampionatin italian. Ishte skuadra mike ajo që kaloi e para në avantazh, duke shokuar publikun vendas, por Milani reagoi me forcë dhe përmbysi gjithçka falë dy golave të Rafael Leão.
Fiorentina zhbllokoi rezultatin në minutën e 55-të me një goditje të saktë nga afër zonës, duke ndëshkuar një moment përgjumjeje të mbrojtjes kuqezi. Megjithatë, goli shërbeu si një alarm për Milanin, që ndryshoi ritmin e lojës dhe nisi të shtonte presionin në gjysmën fushës kundërshtare.
Reagimi nuk vonoi. Pas vetëm tetë minutash, Leão barazoi shifrat me një depërtim individual dhe një finalizim tipik të tij. Futbollisti portugez ishte padyshim lojtari më vendimtar i ndeshjes, duke rikthyer shpresën për kuqezinjtë dhe duke ndezur tribunat e “San Siros”.
Kur ndeshja po shkonte drejt barazimit, në minutën e 86-të, Milani fitoi një penallti të cilën Leão e shndërroi në gol me qetësi maksimale, duke vulosur përmbysjen. Minutat e fundit panë një Fiorentinë që tentoi gjithçka për të shpëtuar të paktën një pikë, por Mike Maignan dhe mbrojtja e Milanit ruajtën epërsinë me vendosmëri.
Fitorja vjen në një moment të rëndësishëm për skuadrën kuqezi, që synon të mbajë hapin në garën për kreun e renditjes. Nga ana tjetër, Fiorentina pëson një tjetër humbje që e thellon krizën e rezultateve dhe rihap diskutimet mbi stabilitetin e ekipit.
Lini një Përgjigje