FLASH
Shkruar nga Pamfleti
Barcelona është në një krizë të dukshme në këtë sezon. ”Magjia” e edicionit të kaluar në kampionat nuk po përsëritet dhe skuadra e Çavit e sheh veten larg kryesuesve të Zhironës dhe rivalëve historikë të Realit të Madridit. Por përtej krizës sportive, është edhe ajo ekonomike.
Klubi vazhdon të jetë i zhytur në borxhe dhe perspektiva e një përjashtimi nga Europa për shkak të çështjes së pagesave të gjyqtarëve, ka shtyrë Laportën që të mendojë mënyra se si të kursejë sa më shumë për ditët e vështira që do të vijnë. Dhe një prej këtyre ideve është që të bllokojnë rrogën e Robert Levandovskit.
Polaku iu bashkua klubit në vitin 2022 duke nënshkruar një kontratë trevjeçare, me opsion për një tjetër vit. Meqë katalanasit kishin probleme likuiditetesh, ai ra dakord që rroga e tij të ishte me rritje vit pas viti.
Kështu, ai përfitoi rreth 17,3 milionë paund në vitin e tij të parë te katalanasit, ndërsa në këtë aktual, rroga e tij është 22,5 milionë paund. Në vitin e tretë, atë të edicionit 2024-2025, rroga e Levandovskit do të rritej në 27,7 milionë paund, sipas marrëveshjes së nënshkruar. Klubi tashmë ka nisur kontaktet, me menaxherin e tij, Pini Zahavi, për ta bindur që të ndryshojnë kushtet e marrëveshjes, në mënyrë që të bllokohet kjo rritje e rrogës së lojtarit dhe ai të paguhet përsëri si këtë vit. Një kursim i vogël, por domethënës për klubin, i cili duke bllokuar rrogën e Levandovskit, kërkon të japë shembullin dhe të bëjë të njëjtën gjë edhe me disa lojtarë të tjerë.
Lini një Përgjigje