FLASH
Shkruar nga Pamfleti
Piloti holandez i Red Bullit, Maks Vershtapen, fitoi sot garën e Çmimit të Madh të Austrisë në Formula 1, suksesi i 7 sezonal, i pesti radhazi, në një botëror që po e dominon më shifra të frikshme. Kampioni i botës në fuqi e dominoi garën e zhvilluar në pistën e Seltueg, duke e lëshuar kreun vetëm për 10 xhiro, të cilin e rifitoi shumë kollaj.
Në vendin e dytë u klasifikua monogasku Sharls Lëklerk me Ferrari, që bëri një garë të mirë, ashtu sikurse u paraqit makina italiane në tërësi në këtë fundjavë. Në vendin e tretë u rendit meksikani Serxhio Perez me makinën tjetër Red Bull, pozicion që e fitoi pas parakalimit të vështirë ndaj spanjollit Karlos Sainz (Ferrari) disa xhiro nga fundi.
Makina virtuale e sigurisë në pjesën e parë të garës e bëri disi më interesante betejën për zonën e pikëve, pasi pilotët hynë në bokse për të ndërruar gomat dhe modifikuar strategjitë. Ndërkohë që sot ndikuan edhe penalitetet që komisarët e garës dhanë për pilotët për tejklalimin e limiteve të pistës (mes tyre edhe Sainz e Hamilton). Kjo solli mjaft parakalime në pistë.
Gjithsesi, Vershtapen bëri një garë me veten, duke e dominuar botërorin e Formula 1, i pashqetësuar nga rivalët. Ai bëri një ndalesë më shumë se rivalët për të marrë edhe pikën shtesë të xhiros së shpejtë dhe sërish nuk u arrit nga rivalët. Në zonën e pikëve u renditën Norris, Alonso, Hemilton, Rasëll, Gasli dhe Stroll.
Lini një Përgjigje