FLASH
Shkruar nga Pamfleti
Armend Muslika vazhdon të tërheqë vëmendjen me paraqitjet e tij mbresëlënëse te Tottenham U-18. Mesfushori qendror i Shqipërisë U-17 zhvilloi një ndeshje spektakolare ndaj West Brom Albion, duke realizuar katër gola në triumfin 5-2 të skuadrës londineze.
Talenti shqiptar ishte i pandalshëm që në minutat e para të takimit. Brenda vetëm 10 minutash, nga minuta e 11-të deri në të 21-ën, Muslika realizoi tripletë, duke vendosur ritmin e sfidës për “Gjelat”.
Veçanërisht i bukur ishte goli i tretë dhe i katërt i mesfushorit shqiptar, ku ai tregoi cilësitë teknike dhe aftësinë në driblim. Në një prej aksioneve, Muslika kaloi dy kundërshtarë me një lëvizje të shpejtë dhe më pas finalizoi me klas për të dërguar topin në rrjetë.
Sfida ishte e vlefshme për javën e 28-të të Premier League U-18, ndërsa performanca e shqiptarit konfirmon formën e tij shumë të mirë këtë sezon.
Sipas statistikave, Muslika ka regjistruar 15 gola dhe 4 asistime në 24 paraqitje me Tottenham U-18 në kampionat, shifra mjaft mbresëlënëse për një futbollist që aktivizohet në rolin e mesfushorit qendror.
Lini një Përgjigje