FLASH
Shkruar nga Pamfleti
Ka këshilluar Ban Ki Moon dhe Dalai Lamën/ Kush është avokati që mbron Berishën në Londër, një nga më të njohurit dhe më të shtrenjtët...
Sali Berisha duket se nuk e kapërdin dot faktin se është “non grata”. SHBA dhe Britania e Madhe e damkosën si të korruptuar dhe prej 3 vitesh, Berisha po përpiqet lart e poshtë duke përdorur kë të mundet për të hequr këtë njollë. Por nga ana tjetër po hedh miliona e miliona, të cilat nuk dihet nga dalin.
Amerikanët ishin ata që e shpallën të parët të padëshiruar dhe lëvizja e parë që bëri Berisha ishte të padiste Sekretarin Blinken në Paris. Berisha pajtoi një prej avokatëve më të mirë atje, Jean Yves Le Borgne. Ai kryeson Shoqatën e Avokatëve Penalë të Francës, dhe ka mbrojtur në gjykatat e këtij vendi shumë personalitete të larta politike si ish-kryetarin e Parisit, Jean Tiberi, ish-drejtorin e kabinetit të Jacques Chirac, biznesmenë të mëdhenj, si edhe ish-bosin e “Renault”, sipërmarrësin Carlos Ghosn.
Pra me pak fjalë, është një ndër avokatët më të mirë dhe kjo do të thotë se tarifa e tij ka qenë shumë e kripur. Berisha kurrë nuk e tregoi se kush e pagoi tarifën e avokatit, edhe pse ai dështoi pasi gjyqi mbeti rrugëve.
Por Berisha nuk u mjaftua me kaq. Ai kontraktoi një kompani lobimi në SHBA, me shpresën se amerikanët do të tërhiqeshin vetë nga akti i sekretarit Blinken. “PRIME Policy Group” mori përsipër lobimet e Berishës, teksa atëherë u tha se gjithçka bëhej pa pagesë. Por në fakt dyshimet janë se ishte e gjitha kamuflim. Kompania në fjalë është gjithashtu mjaft e njohur dhe sipas të dhënave të Departamentit të Drejtësisë, një kontratë me të shkon mbi 400 mijë dollarë.
Por nuk mbyllet me kaq. Sali Berisha u shpall i padëshiruar në vitin 2022 edhe nga Britania. Ndryshe nga SHBA, në Britani ke të drejtën e ankimimit. Berisha e ankimoi vendimin dhe së fundmi ka nisur gjyqi me shpresën se do i hiqet damka. Por edhe këtu Berisha ka pajtuar avokatë.
“Pamfleti” shkroi pak ditë më parë se ai ka kontraktuar studion ligjore “Zaiwalla & Co”. Një prej studiove më të njohur në Londër, e cila ka në fokusin e saj Arbitrazhin, çështjet tregtare dhe sanksionet. Studioja drejtohet nga Sarosh Zaiwalla, një avokat me origjinë indiane. Sipas të dhënave të kompanisë, studioja ka 18 avokatë dhe të ardhurat e tyre vjetore janë mbi 14 milionë paund. Pra tarifat me të cilat ata punojnë janë pak të kripura.
Sarosh Zaiwalla ka këshilluar Sekretarin e Përgjithshëm të Kombeve të Bashkuara, Ban Ki Moon, dhe iu kërkua nga Dalai Lama të lehtësonte një dialog me Qeverinë e Republikës Popullore të Kinës (PRC) në lidhje me një rezolutë për Tibetin. “The Times” e shpalli Saroshin si "Avokatin e Javës" në vitin 2020 për suksesin e tij në Gjykatën e Apelit në favor të klientit të tij, Bankës Qendrore të Venezuelës kundër Bankës së Anglisë për kthimin e arit të Venezuelës me vlerë 1.8 miliardë dollarë.
Për të dytin vit radhazi, Z. Zaiwalla është vlerësuar në Edicionin 2024 të "Avokatëve më të mirë në Mbretërinë e Bashkuar” për zgjidhjen e mosmarrëveshjeve tregtare dhe gjithashtu është vlerësuar me një doktoraturë nderi për kontributin e tij të jashtëzakonshëm në drejtësi nga Universiteti i Boltonit në 2022.
Pra CV-ja e tij tregon qartë se kush është. Pyetja që shtrohet është: Kush i paguan tarifat aty për Berishën? Ish-kryeministri deklaron se ka në pronësi vetëm një apartament 110 metëe katëror. Po këto miliona nga dalin? /Pamfleti
Lini një Përgjigje