FLASH
Shkruar nga Pamfleti
Deputeti socialist Erion Braçe ka reaguar sërish për rritjen e çmimeve të fruta-perimeve, duke theksuar se situata është e njëjtë në disa zona të Tiranës, përfshirë njësitë 2 dhe 3.
Sipas tij, çmimet e produkteve bazë kanë arritur nivele të larta, duke e cilësuar situatën si shqetësuese për konsumatorët.
“Perimet janë çmendur dhe ky është hall i madh!”, u shpreh Braçe në reagimin e tij.
Ai solli si shembull domaten, e cila sipas tij po shitet deri në 350 lekë për kilogram, si dhe specin e kuq që arrin në 450 lekë/kg.
“Domatja vijon me 300-350 lekë/kilogram… Speci i kuq është 450 lekë/kilogram”, theksoi ai.
Braçe theksoi se rritja e çmimeve nuk lidhet drejtpërdrejt me karburantin, duke kundërshtuar një nga arsyet më të përmendura.
“Këto nuk janë çmime prej naftës; rritja me 50 lekë/litër e çmimit të naftës nuk ka këtë impakt tek çmimi i domates e specit”, deklaroi ai.
Sipas Braçes, një nga faktorët kryesorë është ndikimi i çmimeve të importit, që po ndiqet edhe nga prodhimi vendas, ndërsa ky i fundit mbetet i pamjaftueshëm për të mbuluar kërkesën. Ai shtoi se problemet strukturore në bujqësi, përfshirë dëmet nga përmbytjet dhe kushtet klimatike, kanë ndikuar në uljen e prodhimit.
Braçe kritikoi gjithashtu mungesën e reagimit institucional ndaj këtyre problematikave.
“Kemi problem të madh me strukturën e prodhimit… Por kush nuk dëgjon, këto pasoja sjell!”, tha deputeti.
Lini një Përgjigje