FLASH
Shkruar nga Pamfleti
Giorgia Meloni është vënë përballë një armiku të ri.
Kryeministrja e Italisë i ka drejtuar bataret e zjarrit ndaj gjyqësorit, edhe pse kritikët e saj i dënojnë sulmet politike si “të rrezikshme” duke i krahasuar ato me sjelljen prej të forti të hungarezit Viktor Orbán.
Liderja italiane, në krye të qeverisë më të djathtë të Romës që nga regjimi fashist i Benito Musolinit, ka fituar kredibilitet ndërkombëtar me retorikën e saj të moderuar dhe mbështetjen për Ukrainën, por brenda vendit ajo ka ndjekur një axhendë më të ashpër, që synon të forcojë kontrollin mbi institucionet e vendit.
Nga gazetarët apo intelektualët që ngrenë pikëpyetje për aktet e saj publike, te gjyqtarët që marrin vendime kundër politikave të saj, Meloni në mënyrë të vazhdueshme i sulmon si kundërshtarë, duke e portretizuar veten si viktimë.
“Kjo qeveri i ka shndërruar kritikët – ata që nuk pajtohen apo edhe thjesht ata që zbatojnë ligjet ekzistuese – në disidentë”, tha për POLITICO Roberto Saviano, një akuzues i famshëm i antimafias.
Të hënën, një gjykatë në Romë urdhëroi që shtatë azilkërkues egjiptianë dhe nga Bangladeshi të mbajtur në një qendër migracioni në Shqipëri duhet të kthehen në Itali, duke rrëzuar për herë të dytë marrëveshjen kryesore të Melonit me Tiranën për të goditur emigracionin ilegal.
Më 18 tetor, gjykata e Romës kishte vendosur kundër ndalimeve të tjera të emigrantëve nga Bangladeshi dhe Egjipti në Shqipëri, një vendim të cilin kryeministria italiane e cilësoi si “paragjykues”.
“Është shumë e vështirë të punosh dhe të përpiqesh t’i japësh përgjigje shqetësimeve të këtij kombi kur përballesh me kundërshtimin nga një pjesë e atyre institucioneve që duhet të ndihmojnë për të dhënë përgjigje,” tha Meloni duke iu referuar vendimit të gjykatës.
Në një vend ku shumica e njerëzve nuk kanë besim tek gjyqësori, retorika e ashpër e Melonit në fakt mund të rezultojë një strategji e mprehtë politike – pavarësisht nga një ortek kritikash nga establishmenti italian.
Gjyqtarë të tërbuar
Pas deklaratave të Melonit, Zëvendës Prokurori i Gjykatës së Kasacionit, gjykata më e lartë e Italisë, Marco Patarnello u dërgoi një email kolegëve magjistratë në të cilin ai i përshkruante sulmet e saj si “të rrezikshme”.
Pjesë të emailit u publikuan më vonë nga gazeta e krahut të djathtë Il Tempo dhe u postuan nga Meloni në mediat e saj sociale si “provë” që një pjesë e gjyqësorit të Italisë po komploton kundër saj.
Gjyqtarët ishin të inatosur
“Email-i ishte vjedhur nga një qark i mbyllur. Ata nxorën tre fjali dhe fshehën pjesën tjetër të tekstit, i cili thoshte gjëra të kundërta me narrativën që synonin të krijonin, në mënyrë që të mashtronin qytetarët duke menduar se ekziston një gjyqësor i politizuar që dëshiron të rrëzojë qeverinë, “tha Stefano Musolino prokuror dhe sekretar kombëtar i Gjyqësorit Demokratik, një shoqatë magjistratësh me prirje të majtë që synon të mbrojë autonominë e gjyqësorit.
“Kjo nuk është aspak rastësi. Ka një gjyqësor që dëshiron të mbrojë të drejtat dhe dëshiron ta bëjë këtë në mënyrë autonome dhe të pavarur,” shtoi ai.
Meloni, tha ai, nuk po kritikonte vendimin e gjykatës, por vetë gjykatën për mospërmbushjen e pritshmërive të saj.
“Për ne, ky është një vizion i rrezikshëm i marrëdhënieve ndërmjet institucioneve. Sepse nëse Meloni imagjinon një gjyqësor që bashkëpunon me qeverinë do të thotë se ajo imagjinon një gjyqësor që nuk është më autonom dhe i pavarur, por një gjyqësor që i shërben objektivave që qeveria i vendos vetes”, tha ai.
Ministria italiane e Drejtësisë dhe Kabineti i Melonit nuk iu përgjigjën kërkesave të përsëritura të POLITICO-s për koment gjatë një periudhe prej tre javësh.
Klima e frikësimit
Një raport mbi racizmin dhe intolerancën nga Këshilli i Evropës, i botuar më 22 tetor, përmbante paralajmërime kundër “kritikave të shtuara ndaj gjyqtarëve që trajtojnë çështjet e migracionit”, të cilat sipas raportit “vënë në rrezik pavarësinë e tyre”.
Silvia Albano, presidente e Gjyqësorit Demokratik dhe një nga gjyqtaret që vendosi kundër ndalimit të emigrantëve në Shqipëri, bëri denoncim në prokurorinë e Romës më 24 tetor, pasi kishte marrë kërcënime me vdekje.
Në mënyrë të ngjashme, prokurorja Giorgia Righi, e përfshirë në një çështje kundër ministrit italian të Transportit të ekstremit të djathtë, Matteo Salvini, mbi një vendim në gusht 2019 për të ndaluar ankorimin e një varke me emigrantë në Lampedusa, u vendos nën mbrojtjen e policisë muajin e kaluar për shkak të kërcënimeve me vdekje. Forcat e rendit po kujdesen tashmë për dy prokurorët e tjerë të përfshirë në gjyq.
Musolino tha se kërcënimet përbënin “frikësim” të gjyqtarëve dhe shtoi se ai pajtohet plotësisht me shqetësimet e Këshillit të Evropës.
“Çdo gjyqtar që merret me migracionin sot, ose që do të merret me të nesër, praktikisht do të pyesë veten nëse është e përshtatshme për të që të vazhdojë të jetë një gjykatës autonom i pavarur evropian apo nëse është më mirë të heshtë dhe të bëjë si të dojë qeveria. ”, tha ai.
Sipas gazetarit italian Saviano, i cili ka jetuar vetë nën mbrojtjen e policisë për 18 vjet për punën e tij zbuluese për mafien Camorra të Napolit, Meloni është sistematike në shënjestrimin e atyre që e kritikojnë.
“Këto sulme përshkruajnë një strategji,” tha ai. “Metodat dhe objektivat janë të njëjta, dallimet e vetme varen nga roli i njerëzve që herë pas here duhet të goditen, të diskreditohen, të frikësohen dhe të heshtin.”
Saviano, një kritik i gjatë i qeverisë së Melonit, u gjobit për shpifje në tetor 2023 pasi iu referua kryeministres dhe Salvinit si “bastardë” mbi politikat e tyre të migracionit.
“Mesazhi është se kushdo që guxon të kontrollojë apo edhe thjesht të kritikojë veprimet e qeverisë – qoftë edhe sikur të jetë roli i tyre institucional që e kërkon atë, ose sepse si qytetarë të thjeshtë ata besojnë se kritika ndaj pushtetit është në esencë të demokracisë – duhet ta dijë se, nëse këmbëngulin, do ta kenë të vështirë”, tha ai. “Sidomos nëse kanë të drejtë.”
Më ‘tinzar’ se Berluskoni
Në letrën e tij paralajmëruese drejtuar kolegëve, Patarnello bëri një krahasim negativ të Melonit me kryeministrin e ndjerë italian Silvio Berlusconi, vetë një kritik i shpeshtë i gjyqësorit, duke i përshkruar sulmet e saj ndaj gjyqtarëve si “më të rrezikshme dhe më tinëzare”.
Berlusconi, i cili vdiq në qershor 2023, ishte i njohur në Itali dhe në mbarë botën për skandale seksuale dhe përfshirjen e tij në gjyqe të shumta mashtrimi dhe korrupsioni.
Gjatë gjithë karrierës së tij të gjatë politike, Berlusconi sulmoi në mënyrë të përsëritur gjyqësorin italian, duke akuzuar magjistratët dhe gjyqtarët se ishin të majtë dhe komplotuan kundër tij.
Por sulmet e tij, tha Musolino, nuk kishin për qëllim dobësimin e pavarësisë së sistemit gjyqësor.
“Berluskoni kishte një fokus më funksional në mbrojtje, në gjyqet që kishin të bënin me të. Propozimet e tij kurrë nuk kishin për qëllim reformimin apo vënien në pikëpyetje të shtetit ligjor siç e njohim ne”, tha ai.
Sipas Francesco Galietti, themelues i organizatës për konsulencë politike, Policy Sonar, Meloni e sheh përplasjen me gjyqësorin si një mundësi politike.
“Meloni e di se gjyqësori është një nga kategoritë më pak të pëlqyera në vend,” tha ai, pas një sondazhi të botuar në fund të shtatorit, që tregon se 54 përqind e italianëve thanë se kishin pak besim në sistemin gjyqësor.
“Perspektiva e Melonit është disi inovative, por në një mënyrë diabolike” tha ai. “Ajo e dëshiron këtë përplasje sepse kjo është ajo që i duhet.”
Qëllimi ideologjik dhe politik fshihet pas kësaj, thonë kritikët.
“Modeli i Melonit është i Orbanit”, tha Saviano. “Ideja e Melonit për shtetin është autoritare, edhe nëse në një kontekst demokratik: Objektivi i tij është të rrëzojë të gjitha autoritetet që duhet të kontrollojnë qeverinë, jo vetëm në nivel kriminal.
“Nga ky këndvështrim, përgjegjësitë e Evropës janë të mëdha: Është Komisioni Evropian që ka bërë që fuqia dhe ndikimi i Orbanit të rritet përtej masës,” shtoi ai.
Lini një Përgjigje