FLASH
Shkruar nga Pamfleti
Festivali “Sunny Hill” nuk do të mbahet këtë vit në Prishtinë.
Kështu kanë bërë me dije oganizatorët e eventit, të cilët thanë se festivali do të mbahet në fillim të gushtit të vitit 2024.
Sipas tyre, arsyeja e “anulimit” është se po e përgatisin një “shtëpi” të re, të përhershme në Bërnicë për mbajtjen e këtij eventi.
“Tani ka ardhur koha ta bëjmë një hap tjetër të madh përpara. Këtë vit, ne po bëjmë gati shtëpinë tonë të re, hapësirën e përhershme të festivalit në Bërnicë. Një vend i cili ua mundëson gjithë pjesëmarrësve ta marrin përvojën më të mirë që ata të gjithë e presin dhe meritojnë.
Përjetimet e paharrueshme që i sjell Sunny Hill Festival janë më të rëndësishmet. E pjesëmarrësit në festival e meritojnë absolutisht më të mirën. Në të gjitha aspektet, përfshirë edhe hapësirën kushtuar festivalit, me infrastrukturën e plotë. Ne besojmë se nxitimi i procesit të punës do të zvogëlonte cilësinë dhe esencën e asaj që Sunny Hill Festival e përfaqëson. Duke qenë edhe vetë fansa të muzikës dhe festivaleve, ne besojmë shumë në ofrimin e përvojës unike dhe të jashtëzakonshme që ne si festival duhet ta ofrojmë.
Prandaj, kemi marrë vendimin e vështirë për ta shtyrë edicionin e sivjetmë të Sunny Hill Festival, që t’i japim kohë krijimit të hapësirës së re. Ruani datat për një edicion masiv të Sunny Hill Festival në fundjavën e parë të gushtit 2024.”, thuhet në njoftimin e Sunny Hill Festival.
Kujtojmë se edhe vitin e kaluar festivali u shty për shkak të mosmarrëveshjes me Komunën, pasi kjo e fundit nuk ishte pajtuar fillimisht që festivali të mbahej në Parkun e Gërmisë, por më pas e kishte lejuar një gjë të tillë.
Lini një Përgjigje