FLASH
Shkruar nga Pamfleti
Katër anëtarët e një grupi të krimit të organizuar që tentuan të kontrabandonin 139 kilogramë kokainë në Mbretërinë e Bashkuar, duke e fshehur në kontejnerin me banane, janë dënuar me rreth 61 vite burg në Angli.
Sipas mediave britanike, koka e këtij grupi, Mirgert Shahu, është dënuar me 18 vjet burg. Gjithashtu, për kalimin e kokainës me vlerë 11 milionë paund, kishte ndihmuar dhe një anglez, Robert Ball, i cili u dënua po me 18 vjet burg.
Dy bashkëpunëtorët e tyre, Florjan Ibra u dënua me 13.5 vite burg dhe Arman Kaviani me 12 vite e nëntë muaj.
Autoritetet kishin konstatuar drogën në port, dhe e kishin hequr, por kamionin e kishin lënë të kalonte, për të parë se kush e posedonte lëndën narkotike. Arrestimi i Shahut, Ball Ibrës dhe Kavianit, është bërë në prill të 2022 teksa po shkarkonin drogën në çatinë e kontejnerit, që besonin se e kishin ende.
Ball dhe Shahu u dhanë udhëzime Kavianit dhe Ibrës në oborrin e magazinimit, të cilët përdorën një kamion forklift për të hipur në majë të kontejnerit.
Ata hapën çatinë duke përdorur një levë dhe filluan të shkarkonin pakot, por në proces e sipër NCA dhe oficerët e policisë mbërrijnë për t’i arrestuar.
Të katër burrat u akuzuan për trafikim të lëndëve narkotike, ndërsa Kaviani u akuzua gjithashtu për posedim me qëllim furnizimi pasi u gjet në shtëpinë e tij meta kristal me vlerë 500,000 paund.
Lini një Përgjigje