FLASH
Shkruar nga Pamfleti
Një 39-vjeçar ka rënë në prangat e Policisë, pasi qarkullonte me armë automatike dhe motomjet pa targa në fshatin Dajç të Lezhës.
Gjatë operacionit, 39-vjeçari Arben Leka u ndalua teksa tentonte të largohej me motomjetin pa targa. Në kontrollin e ushtruar, u sekuestruan një armë automatike me fishek në fole, municion luftarak dhe motomjeti me të cilin lëvizte.
"Forca e Posaçme “Shqiponja”, në bashkëpunim me shërbimet e Komisariatit të Policisë Lezhë, pas marrjes së një informacioni në rrugë operative, se një shtetas i armatosur po lëvizte me motomjet në fshatin Dajç, me qëllim kryerjen e një ngjarjeje kriminale për shkak të një konflikti të mëparshëm, organizuan punën dhe ndërhynë menjëherë për neutralizimin e situatës.
Shërbimet e Policisë lokalizuan motomjetin pa targa ku drejtuesi i tij tentoi të largohej, por u neutralizua me profesionalizëm nga efektivët e Forcës së Posaçme “Shqiponja”.
Gjatë kontrollit të ushtruar në motomjet, u gjetën dhe u sekuestruan në cilësinë e provës materiale një armë zjarri automatike, me fishek në fole gati për qitje, një sasi municioni luftarak dhe motomjeti pa targa me të cilin lëvizte shtetasi.
Në përfundim të veprimeve procedurale, u bë arrestimi në flagrancë i shtetasit Arben Leka, 39 vjeç, banues në Lezhë, për veprën penale “Mbajtja pa leje dhe prodhimi i armëve, armëve shpërthyese dhe i municionit”, parashikuar nga neni 278 i Kodit Penal", njofton policia.
Lini një Përgjigje