FLASH
Shkruar nga Pamfleti
Policia e Shtetit ka dhënë një informacion zyrtar lidhur me dhunën ndaj 46-vjeçarit, Albert Pashaj, pronarit të një prej hoteleve në Ksamil, i cili u shfaq i gjakosur pas një konflikti që kishte pasur për çadrat në plazh.
Policia njofton se ka arrestuar 3 persona, mes të cilëve edhe Agim Taraj, pronarin e një tjetër biznesi në zonë, ndërsa ka proceduar në gjendje të lirë edhe një 17-vjeçar. Dy të arrestuarit e tjerë janë Silvjan Sulku dhe Aldo Zeqiraj.
Ndaj tyre janë ngritur akuza ‘plagosje e lehtë me dashje’ e kryer në bashkëpunim.
Gjithashtu njoftohet se është proceduar penalisht edhe bashkëshortja e 46-vjeçarit të dëmtuar, pasi shkaktoi dëme materiale në “beach bar”-in e njërit prej të arrestuarve.
“Në vijim të zbardhjes së plotë të rrethanave të konfliktit të ndodhur ditën e djeshme, në Ksamil, dhe dokumentimit të plotë të ngjarjes, me qëllim vënien përpara përgjegjësisë penale të autorëve, specialistët për Hetimin e Krimeve në Komisariatin e Policisë Sarandë arrestuan në flagrancë, për veprën penale “Plagosje e lehtë me dashje”, kryer në bashkëpunim, shtetasit:
A. T., 43 vjeç, banues në Berat, S. S., 18 vjeç, banues në Dibër dhe A. Z., 35 vjeç, banues në Durrës.
Gjithashtu, u procedua penalisht në gjendje të lirë, për shkak të moshës, një shtetas i mitur, 17 vjeç, banues në Kamëz, Tiranë.
Nga hetimet rezultoi se këta shtetas, në bashkëpunim me njëri-tjetrin, për motive të dobëta, kanë goditur me sende të forta, pranë një plazhi publik në Ksamil, shtetasin A. P., 46 vjeç, banues në Tiranë, duke i shkaktuar dëmtime trupore.
Gjithashtu, lidhur me këtë ngjarje, u referuan materialet në Prokurori për veprën penale “Shkatërrimi i pronës” dhe nisi procedimi penal për shtetasen O. P., 40 vjeçe, pasi pas konfliktit kjo shtetase ka dëmtuar ambientin duke shkatërruar pajisje dhe sende të tjera në “beach bar”-in e shtetasit të arrestuar A. T.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme”, njoftoi Policia.
Lini një Përgjigje