FLASH
Shkruar nga Pamfleti
Një konflikt i gjatë për pronësinë e një rruge në zonën turistike të Drilonit në Pogradec ka përfunduar në përplasje fizike, duke sjellë në hetim katër persona, përfshirë emra të njohur të zonës. Ngjarja ka ndodhur pranë parkut të Drilonit, ku është përplasur fizikisht pronari i hotelit “Driloni”, Jetmir Muçllari, bashkë me djalin e tij 26-vjeçar, Johan Muçllari, kryeplaku i fshatit Tushemisht, Ilirjan Tasellari, si dhe një person tjetër, Prokop Pilinçi.
Burime zyrtare bëjnë me dije se përplasja ka ardhur si pasojë e një konflikti të hershëm për një rrugë që ndodhet pranë kufirit të pronës së kryeplakut. Biznesmeni Muçllari ka pretenduar pronësinë e rrugës dhe ka vendosur një gardh rrethues në pjesën e kontestuar, çka ka shkaktuar përshkallëzim të tensioneve.
Kryeplaku Tasellari ka raportuar më parë rastin në polici, por duket se mungesa e ndërhyrjes efektive ka çuar në përkeqësimin e situatës. Përplasja fizike është vetëm episodi i fundit në një seri incidentesh që kanë ndodhur ndër vite mes palëve.
Ngjarja ka tërhequr vëmendjen e autoriteteve lokale, të cilat kanë nisur hetimet për të përcaktuar përgjegjësitë ligjore dhe për të vendosur qartësisht statusin e pronësisë mbi rrugën e përplasjes. Ky incident ngre sërish në qendër të vëmendjes problemin e pronave të paqarta dhe rolin e dobët të institucioneve në zgjidhjen e konflikteve lokale.
Lini një Përgjigje