FLASH
Shkruar nga Ylli Pata
Mbështetësit e doktorit e konsiderojnë zbritjen nga kati i tetë si pafajësi edhe pse nuk është e tillë.
Vendimi i GJKKO-së, edhe pse është sjellë si një akt procedurial, ka sjellë një impakt politik të fuqishëm në terren.
Një impakt politik shumëdimensional, që do të ketë pasoja, por më shumë zhvillime politike drejt zgjedhjeve parlamentare por jo vetëm.
Ai akt, ka krijuar një traumë të rëndë në një pjesë të madhe të publikut, se një i akuzuar për në vepër korrupsioni të llahtarshme, mund të jetë në liri, mund të drejtojë parti e bëjë propagandë, vetëm se e ka mundësinë ta bëjë një gjë të tillë.
E pikërisht ky standard i vendosur ka krijuar një brengë, një traumë, se kemi të bëjmë me një qëndrim thuajse politik të drejtësisë së re.
E me hapjen e këtij kapitulli të ri, ka shumë gjasa që ka humbur ai perceptimi se kemi të bëjmë me një grup apo organ “spartan” që nuk ndikohet nga klima e jashtme, por vetëm shikon drejt.
Në rastin e Sali Berishës, është parë më shumë se drejt. Kur kemi të bëjmë me një rast korrupsioni të shkallës së parë, të provuar në më shumë se 500 faqe të argumentuara.
Në radhë të parë, ai publik që është traumatizuar nga lirimi i Sali Berishës, nuk do mund ta gëlltisë siç ka bërë deri tani që një zyrtar të së majtës ta rrasë brenda qoftë edhe me një dyshim apo akuzë për shpërdorim detyre. Ke nxjerrë jashtë një kryeministër që i dha vajzës së vet një llokëm të artë të Tiranës!
Nejse përjashto frustrimin e të majtëve për lirimin e Berishës, kemi entuziazmin e mbështetësve të doktorit për këtë akt. Që nuk janë kursyer, qoftë spontan apo i dirigjuar. Por në fund, janë qëndrime palësh. Mbështetësit e doktorit e konsiderojnë zbritjen nga kati i tetë si pafajësi edhe pse nuk është e tillë.
Por si perceptim ashtu është marrë. E në zgjedhjet duket se do të përplaset sërish brenga për të paprekshmit që sido që të jetë e gjejnë një artific ligjor, kurse ca të tjerë që edhe mund të jenë të përfshirë në afera, nuk mund e nuk kanë pse të kthehen në armë politike kundër një pjese politike që e ka sjellë këtë drejtësi të re.
Ndaj liria e Berishës ka shumë gjasa që të kthehet në një argument politik më shumë se juridik në fushatën e zgjedhjeve, ku nga ana tjetër është edhe precedent.
Sepse Ilir Meta, sot më shumë se dje kërkon që të jetë i lirë, edhe pse akuzohet gjithashtu për vepra të rënda. Natyrisht që kemi të bëjmë me një zhvillim procedurial e juridik që duhet të mësohemi, ku masat e sigurisë, gjykimi e më pas vendimet që kanë shkallët e tyre, nuk duhen futur në luftën politike.
Por ndërkaq, e kanë bërë zbritjen e Berishës nga kati i tetë po na e shesin si një prelude pafajësie, megjithëse nuk është aspak e vërtetë. Por pikërisht kjo do të sjellë reaksionin final, madje edhe më final që ka ndodhur deri tani kundër të paprekshmëve. E thonë edhe sondazhet…
Lini një Përgjigje