FLASH
Shkruar nga Enea Janko
Pra, në vitin 2024 qeveria jo vetëm që ka paguar më pak se gjysmën e vlerës si përqindje mbi shpenzimet totale për pensionet, krahasuar me vitin 2013, por edhe si vlerë absolute ka paguar 4.477 miliardë lekë ose 10.43 % më pak sesa ka paguar qeveria në vitin 2013....
Ndërsa të ardhurat totale të qeverisë në vitin 2024 u rritën me rreth 700 milion euro krahasuar me vitin 2023, duke tejkaluar me rreth 350 milion euro edhe planin fillestar të qeverisë për vitin 2024, të ardhurat nga kontributet e sigurimeve shoqërore për vitin 2024 u realizuan në masën 139.4 miliardë lekë, me një tejkalim prej 2 miliardë lekë ose 102 % në krahasim me planin, ndërsa shpenzimet për pensionet në tërësi u realizuan në masën 177.8 miliardë lekë, ose 0.2 miliardë më pak në krahasim me planin, me gjithë indeksimin 4.1% dhe bonuset e dhëna.
Rritja e të ardhurave nga sigurimet shoqërore siç është deklaruar edhe nga vetë drejtuesit e Institutit të Sigurimeve Shoqërore, ka ardhur kryesisht për shkak të rritjes së pagave, ndërkohë që mosrealizimi i shpenzimeve për pensionet ka ardhur si rezultat i frikës apo hezitimit të kryeministrit Rama për të rritur sadopak nivelin e pensioneve apo ndihmave sociale.
Krahasuar me vitin 2023, siç tregohet edhe në tabelën e mëposhtme, të ardhurat nga sigurimet shoqërore në vitin 2024 u rritën me 14.772 miliardë lekë (rreth 151 milion euro) ose 11.85 %, ndërsa shpenzimet totale për sistemin e pensioneve u rritën me vetëm 7.599 miliardë lekë (77.5 milion euro) ose 4.46 %. Pra shpenzimet për pensionet në përqindje u rritën sa 37.6 % e rritjes së të ardhurave nga kontributet e sigurimeve shoqërore.
Deficiti i të ardhurave nga sigurimet shoqërore krahasuar me shpenzimet në vitin 2024 krahasuar me vitin 2023, u ul me 7.2 miliard lekë (73 milion euro), ose rreth 15.73 %.
Siç tregohet edhe në tabelë në vitin 2024 shpenzimet për sistemin e pensioneve janë mbuluar në masën 139.4 miliardë lekë ose 78.39 % nga të ardhurat nga kontributet e taksapaguesve për sigurimet shoqërore, ndërsa qeveria ka mbuluar vetëm 38.4 miliardë lekë ose 21.61 % të këtyre shpenzimeve. Ndërkohë që në vitin 2023 qeveria ka paguar 45.6 miliardë lekë ose 26.79 % të shpenzimeve totale për sistemin e pensioneve.
Pra gjatë vitit 2024, kryeministri Rama për pensionet ka paguar 7.2 miliardë lekë ose 73 milionë euro më pak sesa në vitin 2023, për të mbuluar deficitin e krijuar nga të ardhurat e arkëtuara nga kontributet e vetë taksapaguesve për sigurimet shoqërore. Në vitin 2023 shpenzimet buxhetore për pensionet kanë qenë sa 24.39 % e shpenzimeve totale të qeverisë ndërsa në vitin 2024 ato kanë qenë sa 23.06 % e shpenzimeve totale buxhetore ose 1.33 % më pak.
Sa për informacion më poshtë po bëjmë një krahasim të të ardhurave dhe shpenzimeve buxhetore për sigurimet shoqërore në vitin 2024 me vitin 2013.
Siç tregohet edhe në tabelat e mëposhtme në vitin 2013 qeveria ka paguar 42.9 miliardë lekë ose rreth 45.66 % të shpenzimeve totale për sigurimet shoqërore, ndërkohë që 54.34 % e këtyre shpenzimeve mbuloheshin nga të ardhurat nga kontributet e taksapaguesve.
Pra, në vitin 2024 qeveria jo vetëm që ka paguar më pak se gjysmën e vlerës si përqindje mbi shpenzimet totale për pensionet, krahasuar me vitin 2013, por edhe si vlerë absolute ka paguar 4.477 miliardë lekë ose 10.43 % më pak sesa ka paguar qeveria në vitin 2013.
Më poshtë po paraqesim nivelin e pensioneve në vendet e tjera të rajonit të Ballkanit Perëndimor.
Në Shqipëri pensioni mesatar 165 euro në muaj.
Në Kosovë pensioni mesatar 228 euro në muaj ose rreth 138 % e pensionit mesatar në Shqipëri.
Në Bosnje & Hercegovinë, pensioni mesatar 340 euro në muaj, ose rreth 206 % e pensionit mesatar në Shqipëri.
Në Maqedoninë e Veriut, pensioni mesatar në 405 euro në muaj ose rreth 245 % e pensionit mesatar në Shqipëri.
Në Serbi, pensioni mesatar 433 euro, ose rreth 262 % e pensionit mesatar në Shqipëri.
Në Malin e Zi, nivelin e pensionit mesatar 450 euro në muaj ose rreth 273 % e pensionit mesatar në Shqipëri
A mund ti afrohet niveli i pensioneve në Shqipëri atyre në vendet e tjera të Ballkanit?
Të gjitha mundësitë janë.
Po vullneti?!
Lini një Përgjigje