FLASH
Shkruar nga Pamfleti
Industria e mashtrimit me forex dhe kripto gjeneron, sipas vetë SPAK-ut, 50 milionë euro dëm çdo tre muaj. Por në katër vjet, vetëm 7 çështje penale kanë shkuar në gjyq. Asnjë organizator i nivelit të lartë nuk është dënuar përfundimisht. Mars 2026: dy dënime të prishura në apel, dy organizatorë të lirë në Dubai, tre të tjerë në kërkim
Në raportin vjetor për vitin 2024, Prokuroria e Posacme deklaroi se kishte regjistruar 483 çështje nën hetim, me 257 persona nën hetim, dhe kishte dërguar 41 çështje për gjykim. Por nga 483 çështjet totale, Pamfleti identifikoi vetëm 5 deri në 7 që lidheshin me mashtrimin e call-centereve, forex-in dhe kriptovalutat. Kjo pavarësisht se SPAK-u deklaroi në nëntor 2022 se dëmet nga këto mashtrime kapnin vlerën e rreth 50 milionë eurove çdo tre muaj, pra rreth 200 milionë euro dëm në vit. Përgjigja e SPAK-ut ndaj kësaj industrie është, në terma statistikorë, pothuajse inekzistente.
Në mars 2026, asnjë organizator i nivelit të lartë nuk është dënuar përfundimisht. Armant Josifi, të cilin SPAK e identifikoi si drejtues të një rrjeti që shkaktonte 50 milionë euro dëm në tremujor, jeton i lirë në Dubai. Vëllezërit Prekaj, organizatorët e Balkanspro-s, janë në kërkim që nga janari 2026.
Pamfleti kreu një kërkim të plotë dhe arriti të identifikojë të gjitha dosjet penale të regjistruara për mashtrim me call-centere, forex dhe kriptovaluta që kanë kaluar nga SPAK nga viti 2022 deri në mars 2026.
Dosja 1: Milton Group / Grupi Josifi (proc. nr. 301/2021)
Procedimi u regjistrua në vitin 2020. Operacioni u finalizua në nëntor 2022, kur u kontrolluan 15 call-centere në disa vende. Në Shqipëri u bastisën 6 call-centere. Katër persona u arrestuan. SPAK dërgoi për gjykim 5 persona në shkurt 2025. Dëm i dokumentuar: 6.1 milionë euro. Organizatori kryesor, Armant Josifi, ish-këshilltar i ministres Olta Xhacka dhe bashkëthemelues i një kompanie me Olsi Ramën (vëllain e Kryeministrit), nuk u përfshi në grupin e dërguar për gjykim. Josifi u arrestua në Dubai në shtator 2023, por Spanja dështoi ta ekstradonte dhe u lirua. Në mars 2026, Josifi vazhdon të jetojë i lirë në Emiratet e Bashkuara Arabe.
Dosja 2: Blue Energy Call / Globalix / BrokerZ (proc. nr. 300/2021)
Procedimi u regjistrua në dhjetor 2021. Në mars 2022, SPAK bastisi ambientet e kompanisë në Tiranë. 13 të pandehur u dërguan për gjykim në qershor 2023. GJKKO dënoi kryesuesit me 11 vjet burg secilin në korrik 2024. Por në prill 2025, Gjykata e Posacme e Apelit prishi vendimin dhe e dërgoi çështjen për rigjykim. Në mars 2026, ata presin rigjykim.
Dosja 3: Grupi Domi-Mici (proc. nr. 166/2021)
Procedimi u regjistrua në vitin 2021. Operacioni u finalizua në dhjetor 2022. Dëm i dokumentuar: 15 milionë euro. GJKKO dënoi organizatorët me 8 dhe 7.4 vjet burg. Por Apeli e rrëzoi vendimin, duke e rikthyer çështjen për rigjykim. Në mars 2026, ata presin rigjykim.
Dosja 4: Operacioni PANDORA (2024)
Procedimi u finalizua në korrik 2024. Dëm i dokumentuar: 365 mijë euro. Në mars 2026, nuk ka informacion nëse çështja është dërguar për gjykim.
Dosja 5: Balkanspro / Vëllezërit Prekaj (janar 2026)
Në janar 2026, SPAK bastisi call-centerin Balkanspro. Gjashtë operatorë u arrestuan. Tre pronarët, Alfred, Agim dhe Arjan Prekaj, mbeten në kërkim. SPAK dërgoi për gjykim 17 persona, të akuzuar për zhvatjen e 4.7 milionë eurove nga rreth 1,200 shtetas italianë. Në mars 2026, vëllezërit Prekaj vazhdojnë të jenë në kërkim.
Dosja 6: Capital SHPK 1001 / Rafael Genish (proc. nr. 6055/2021)
Kjo dosje u hetua nga Prokuroria e Tiranës. 39 të pandehur u dërguan për gjyq në nëntor 2024. Në mars 2026, gjykimi është në vazhdim.
Bilanci: 4 vjet, zero dënime përfundimtare
Në mars 2026, bilanci është: të paktën 7 dosje të regjistruara, rreth 80-90 persona të dërguar për gjykim, dhe zero dënime përfundimtare për organizatorët e nivelit të lartë. Dy vendime të GJKKO-së janë prishur në apel. Armant Josifi jeton i lirë në Dubai. Vëllezërit Prekaj janë në kërkim. Xhulio Malaj u lirua pa shpjegim.
200 milionë euro dëm, 1.5% e çështjeve të SPAK-ut
Sipas raportit vjetor të SPAK-ut për vitin 2024, çështjet që lidhen me call-center-at përbëjnë vetëm 1 deri në 1.5 për qind të totalit të çështjeve nën hetim, ndërsa ato të dërguara për gjykim zënë 2.4 deri në 4.9 për qind të totalit. Në të njëjtën periudhë, dëmi vjetor i gjeneruar nga kjo industri vlerësohet rreth 200 milionë euro. Për krahasim, totali i aseteve të sekuestruara nga SPAK-u për të gjitha llojet e krimeve së bashku arriti në 65.5 milionë euro. Me fjalë të tjera, vetëm industria e call-centereve mashtruese prodhon tre herë më shumë dëm sesa SPAK-u arrin të sekuestrojë në tërësi nga e gjithë veprimtaria kriminale në vend.
Pse nuk funksionon sistemi?
Mungesa e rezultateve lidhet me disa faktorë strukturorë. Së pari, hendeku i kapaciteteve: SPAK ka rreth 17 prokurorë për të gjitha llojet e krimit, ndërsa mashtrimi kibernetik është teknikisht i komplikuar dhe kërkon burime të mëdha njerëzore dhe teknike. Së dyti, problemet në gjykatë: dy vendimet kryesore të GJKKO-së u prishën në apel, duke minimizuar efektin frikësues të drejtësisë. Së treti, lidhjet politike: Armant Josifi, ish-këshilltar i një ministre dhe bashkëpunëtor i vëllait të Kryeministrit, nuk u përfshi në grupin e dërguar për gjykim pasi SPAK ia kaloi hetimin Spanjes.
Një industri që gjeneron 200 milionë euro dëm në vit dhe punëson 25 mijë persona nuk mund të adresohet me 7 dosje në 4 vjet. Pyetja nuk është vetëm teknike: a ka vullnet politik për të shkatërruar industrinë e call-centereve? Kur organizatori kryesor i rrjetit më të madh të mashtrimit rezulton të jetë ish-këshilltari i një ministre dhe partneri i vëllait të Kryeministrit, përgjigja bëhet e vetëkuptueshme... /Pamfleti
Organizatori i vërtetë i tyre është vetë shefi i rilindjes së plehrave.Drejtësia, nëse ka,duhet t'a kapë për zhelesh këtë mafie kriminele që ka pushtuar gjitha pushtetet politike, ekonomike e administrative të vendit,që e ka katandisur atdheun tonë një zhele mjerane të korrupsionit total.Si ka mundësi që një vend e popull aq i vogël të prodhojë aq shumë njerëz hajdutë e gangsterë,sa askund tjetër në botë ka thënë At Zef Pllumit.. Kjo është e vërteta e hidhur...