FLASH
Shkruar nga Ines San Martin
Krahas kardinalëve që do votojnë për Papën e ri, rreth 70 deri në 80 persona ndihmës - infermierë, mjekë, asistentë liturgjikë, kamerierë dhe kuzhinierë - do të mbeten të pranishëm, të gjithë të lidhur nga një betim sekreti dhe të izoluar nga pjesa tjetër e botës.
Në zemër të Qytetit të Vatikanit, Casa Santa Marta, zakonisht e qetë, është plot me punëtorë, inxhinierë dhe zyrtarë të Vatikanit që po e transformojnë rezidencën e Papa Françeskut në “shtëpinë e mysafirëve”.
Me konklavin e vitit 2025 për të zgjedhur pasardhësin e Papa Françeskut që do të fillojë më 7 maj, shtëpia e mysafirëve të Vatikanit po përgatitet të strehojë 128 nga 133 zgjedhësit kardinalë që pritet të jenë të pranishëm gjatë konklavit, sipas një burimi që kërkoi të mos identifikohej.
Ky ndryshim nga një hotel i përgjithshëm në një konvikt të sigurtë për kardinalët që marrin pjesë në konklavë u bë i dukshëm më 29 prill, kur të gjithë banorët e përhershëm, përfshirë disa kardinalë që kanë pasur një dhomë atje për vite me radhë, u detyruan të lironin dhomat e tyre. Sipas një zyrtari të Vatikanit me njohuri të drejtpërdrejta mbi përgatitjet, shumë do të kthehen në të njëjtat dhoma sapo të fillojë konklava, por vetëm pasi çdo dhomë të inspektohet, sigurohet dhe vuloset.
Të nesërmen, stafi i Guvernatorit të Vatikanit filloi një rikonstruksion 1-javor të objektit. Çdo detaj - nga bravat e dyerve deri te rregullimi i grilave - është duke u shqyrtuar. Kuzhina, e mbyllur përkohësisht, po i nënshtrohet një pastrimi të thellë për të përmbushur protokollet e konklavës. Edhe garazhi nëntokësor është ripërdorur si një qendër logjistike, ku çarçafët e pastër, ushqimi i freskët dhe sendet e tjera thelbësore do të shpërndahen nën mbikëqyrjen e kujdesshme të sigurisë së Vatikanit.
Edhe pse shpesh shoqërohet me rehati, bujtina nuk është hotel në kuptimin tradicional.
“Nuk ka minibar apo shërbim në dhomë”, vuri në dukje zyrtari, duke shtuar “disa banorë kishin frigoriferë të vegjël, por gjatë konklavës, fokusi është thjeshtësia dhe siguria, jo komoditeti.”
Shërbimi në dhomë? Jashtë diskutimit, përveç rasteve kur një mysafir është i sëmurë, apo në fazë rikuperimi.
Kuzhina do të ketë në staf të njëjtën ekip të vogël që zakonisht i shërben Santa Martës: dy kuzhinierë të rinj italianë dhe një shefe kuzhine nga Afrika.
Menutë - ndonëse jo luksoze - pritet të jenë me cilësi të lartë dhe të përshtatura sipas nevojave shëndetësore të kardinalëve, duke përfshirë ata që janë diabetikë, intolerantë ndaj glutenit ose që kërkojnë dieta të veçanta.
Ndërsa Matteo Bruni, drejtor i zyrës së shtypit të Vatikanit, tha gjatë konferencës për shtyp më 2 maj në Vatikan se ai "nuk ka indikacione të sakta" se sa kardinalë do të qëndrojnë jashtë Santa Martës, një burimi i tha OSV Neës se, meqenëse hoteli ka 129 dhoma, do të ketë hapësirë për 128 zgjedhës. Dhoma e përdorur më parë nga Papa Françesku është e vulosur derisa papa i ri ta hapë atë.
Kardinalët e mbetur, tha burimi, do të vendosen në ndërtesën ngjitur "Old Santa Marta", e cila është e lidhur fizikisht me strukturën më të re.
Krahas kardinalëve që do votojnë për Papën e ri, rreth 70 deri në 80 persona ndihmës - infermierë, mjekë, asistentë liturgjikë, kamerierë dhe kuzhinierë - do të mbeten të pranishëm, të gjithë të lidhur nga një betim sekreti dhe të izoluar nga pjesa tjetër e botës.
Ky betim nuk është një gjest simbolik. i njëjti zyrtar i Vatikanit konfirmoi se çdo person brenda mjedisit të konklavit - qoftë kardinal, laik, prift apo peshkop - do t'i nënshtrohet shkishërimit nëse shkel rregullat e rrepta të sekretit të konklavit.
Telefonat, tabletët, laptopët, radiot dhe televizorët do të konfiskohen, do të vendosen në qese të vulosura të etiketuara me emrin e secilit kardinal dhe do të mbahen rezervë deri në përfundim të konklavit.
“Edhe dritaret do të jenë të mbyllura me hermetikë, përfshirë grilat, në mënyrë që askush të mos mund të shikojë jashtë”, tha burimi.
Çdo dhomë e kardinalit do të vuloset pas inspektimit për t'u siguruar që nuk përmban asnjë mjet komunikimi me botën e jashtme. Këto vula do të hiqen vetëm pasi të mbërrijë kardinali-zgjedhës dhe të marrë në zotërim dhomën, gjithmonë në prani të Gardës Zvicerane ose xhandarëve të Vatikanit.
Këto masa sigurie janë të rrënjosura thellë në traditën kishtare. Vetë fjala "konklavë" vjen nga latinishtja "cum clave" - fjalë për fjalë "me çelës" - duke evokuar imazhin e kardinalëve të mbyllur në izolim derisa të zgjedhin një papë të ri. Praktika e bllokimit të zgjedhësve daton që nga konklava e vitit 1271, e cila pasoi gati tre vjet bllokim dhe ndërhyrje politike. Në përgjigje, Papa Gregori X formalizoi procesin e konklavit në vitin 1274 me kushtetutën.
“Ubi periculum”, që kërkon izolim të rreptë dhe votim të vazhdueshëm.
Sekreti u bë edhe më i rëndësishëm në epokën moderne. Gjatë konklavës së vitit 1903, Perandori Franz Joseph i Austrisë ushtroi një të drejtë të gjatë, por të diskutueshme, për të vënë veton ndaj një kandidati - Kardinali italian Mariano Rampolla - përmes një përfaqësuesi brenda Kapelës Sistine. Megjithëse vetoja nuk arriti ta pengonte Rampollën të merrte mbështetje të konsiderueshme, ka të ngjarë të ketë ndikuar në vendimin përfundimtar të kardinalëve. Si rezultat, Papa i sapozgjedhur Pius X e shfuqizoi shpejt veton dhe çdo ndërhyrje laike në zgjedhjet papnore.
Ky angazhim për autonomi u riafirmua nga Shën Gjon Pali II në vitin 1996 me kushtetutën e tij apostolike "Universi Dominici Gregis", e cila rregullon konklavat moderne. Dokumenti përshkruan gjithçka, nga shumica e kërkuar prej 2/3 deri te dënimet për thyerjen e betimit të sekretit. Më vonë u ndryshua nga Papa Benedikti XVI dhe Papa Françesku për të reflektuar ndryshimet në teknologji dhe qeverisjen e kishës.
Konklava e këtij viti paraqet sfida si logjistike, ashtu edhe shpirtërore. Për herë të parë, numri i kardinalëve zgjedhës tejkalon limitin prej 120 të vendosur nga Papa Pali VI në vitin 1970, duke nxitur përshtatje për të akomoduar të gjithë pjesëmarrësit pa kompromentuar integritetin e konklavës.
Megjithatë, thelbi mbetet i pandryshuar. Ndërsa kardinalët vazhdojnë të takohen në Romë — me vetëm një grusht nga 133 zgjedhësit që mungojnë - Vatikani po mbyll në heshtje dyert, po vulos dritaret dhe po përgatit dhomat e asaj që tani është një nga hotelet më të famshme në botë — dhe nga e cila do të dalë Papa i ardhshëm. / Përshtati Pamfleti nga OSV News/
Lini një Përgjigje