FLASH
Shkruar nga Pamfleti
Gjykata federale godet Trump-in: E shndërroi ushtrinë në polici politike!
Një gjykatë federale në Kaliforni ka vendosur se administrata e presidentit Donald Trump ka shkelur ligjin federal kur vendosi të dërgojë trupa të Gardës Kombëtare dhe marinsa aktivë në Los Anxhelos, si përgjigje ndaj protestave që shpërthyen këtë verë kundër operacioneve të zbatimit të ligjit të emigracionit.
Në një vendim prej 52 faqesh, gjyqtari i qarkut Charles Breyer arriti në përfundimin se presidenti Trump dhe administrata e tij kanë shkelur Aktin Posse Comitatus, një ligj i vitit 1878 që ndalon përdorimin e ushtrisë për qëllime të zbatimit të ligjit brenda territorit të SHBA-së. Me vendimin e tij, gjyqtari ndalon përdorimin e Gardës Kombëtare apo të çdo force tjetër ushtarake në Kaliforni për detyra civile si arrestime, ndalime, kërkime, sekuestrime, apo kontroll të trafikut dhe të turmave.
Kjo ndalesë vlen vetëm për përdorimin e Gardës Kombëtare nga administrata Trump në Kaliforni dhe nuk zbatohet në nivel kombëtar. Gjithashtu, nuk e detyron Departamentin e Mbrojtjes të tërheqë 300 pjesëtarët e Gardës Kombëtare që ndodhen ende në Los Anxhelos. Gjykatësi theksoi se administrata është e lirë të përdorë trupa vetëm në përputhje me kufizimet që vendos ligji, përfshirë mbrojtjen e pronës federale.
Vendimi hyn në fuqi më 12 shtator në mesditë, për t'i dhënë kohë administratës që të apelojë në Gjykatën e Apelit të Qarkut të 9-të.
Ky vendim erdhi pas një gjyqi tre-ditor që pasoi padinë e ngritur në qershor nga guvernatori i Kalifornisë, Gavin Neësom, i cili kundërshtoi urdhrin e presidentit për të vendosur Gardën Kombëtare në Los Anxhelos për të shtypur protestat. Trump e kishte përdorur ligjin federal të njohur si Titulli 10 për të marrë nën kontroll Gardën Kombëtare të Kalifornisë dhe për ta angazhuar në mbrojtjen e pronës federale.
Në qershor, Breyer kishte pezulluar përkohësisht vendimin e administratës, duke rikthyer kontrollin e Gardës Kombëtare te shteti i Kalifornisë, por një trupë prej tre gjyqtarësh të Gjykatës së Apelit kishte konstatuar se Trump kishte vepruar ligjërisht nëpërmjet një tjetër dispozite të ligjit federal.
Gjykimi i fundit i Breyer fokusohej specifikisht te Akti i Posse Comitatus. Ai shkroi se provat treguan qartë se administrata kishte përdorur sistematikisht ushtarë të armatosur, shpeshherë të paidentifikueshëm për shkak të pajisjeve mbrojtëse, si dhe automjete ushtarake për të vendosur barriera dhe për të kontrolluar turmat në dhe përreth Los Anxhelosit. Sipas tij, kjo përbën shkelje të drejtpërdrejtë të ligjit.
Ndërkohë që Pentagoni kishte tërhequr rreth 700 marinsa nga zona, 300 trupa të Gardës Kombëtare qëndrojnë ende të dislokuara. Breyer theksoi se presidenti Trump dhe sekretari Hegseth kanë deklaruar synimin për të vendosur forca edhe në qytete të tjera, përfshirë Oaklandin dhe San Franciskon, duke ngritur, sipas tij, një strukturë policore kombëtare nën komandën e presidentit.
Gjykatësi i cilësoi veprimet e administratës si një përpjekje serioze për të përdorur ushtrinë në zbatimin e ligjeve federale të emigracionit dhe drogave, në një mënyrë të ndaluar nga ligji amerikan. Ai hodhi poshtë pretendimet e administratës se presidenti ka të drejtë kushtetuese për të anashkaluar Aktin e Posse Comitatus, duke thënë se një interpretim i tillë nuk mbështetet as në historinë ligjore, as në precedentët e Gjykatës së Lartë, e aq më pak në logjikë.
Breyer i akuzoi zyrtarët e administratës Trump për përpjekje për të uzurpuar kompetencat e Kongresit, duke theksuar se pretendimet e tyre për "përjashtime kushtetuese" janë në fakt një lojë fjalësh për të anashkaluar ligjin dhe autoritetin e legjislativit.
Në përfundim, gjykatësi pranoi kërkesën e Kalifornisë për të ndaluar Gardën Kombëtare nga pjesëmarrja në operacionet e emigracionit në mbështetje të agjentëve federalë, duke theksuar se administrata nuk mund të përdorë sigurinë e stafit federal si justifikim për të vendosur trupa ushtarake në çdo qytet ku ndodhen zyrtarët e saj.
Aktualisht, mbi 2200 trupa të Gardës Kombëtare ndodhen në Uashington DC, pjesa më e madhe e të cilëve janë dërguar nga guvernatorë republikanë, në një kontekst ku presidenti Trump po paralajmëron zgjerimin e pranisë ushtarake në qytete të mëdha si pjesë e një fushate kombëtare kundër emigracionit të paligjshëm, krimit të dhunshëm dhe trazirave civile. /Pamfleti
Lini një Përgjigje