FLASH
Shkruar nga Pamfleti
Ukraina do të pranojë 6 miliardë euro nga Bashkimi Europian në dy muajt e ardhshëm, tha kryeministri ukrainas, Denys Shmyhal, të premten.
Qeveria ukrainase pret të marrë 4.5 miliardë euro në mars, ndërsa 1.5 miliard euro të tjera në prill, sipas Shmyhalit.
BE-ja u pajtua në shkurt për një paketë të ndihmës financiare për Ukrainën në vlerë prej 50 miliardë eurosh për një periudhë katërvjeçare.
“Këtë vit, ne synojmë t’i marrin 16 miliardë euro nga Bashkimi Evropian. Ukraina do t’i ketë burimet për të luftuar dhe për të fituar. Ky është synimi ynë kryesor dhe ne do të bëjmë gjithçka që mundemi për këtë”, theksoi ai.
Pushtimi i Ukrainës nga Rusia ka hyrë në vitin e tretë dhe Kievi varet tejet shumë nga mbështetja ekonomike dhe ushtarake e aleatëve të vet perëndimorë.
Ndihma ekonomike në vlerë miliarda euro në dy vjetët e para e ndihmoi qeverinë të ruajë qëndrueshmërinë makroekonomike, ta luftojë inflacionin dhe t’i kryejë me kohë pagesat e pensioneve dhe rrogat në sektorin publik.
Ukraina e përdor shumicën e buxhetit të brendshëm nga të hyrat për ta financuar mbrojtjen.
Të dhënat e Ministrisë së Financave tregojnë se Ukraina ka marrë 73.6 miliardë euro nga shtetet e huaja në vitet 2022 dhe 2023.
Por, në dy muajt e parë të këtij viti, Kievi i mori vetëm 1.2 miliard dollarë, pasi paketat e mëdha financiare u zvarritën apo u bllokuan.
Ministri i Financave i Ukrainës, Serhiy Marchenko, ka thënë se vendi i tij ka nevojë për 3 miliardë dollarë në muaj për ta kapërcyer vitin 2024. /REL
Lini një Përgjigje