FLASH
Shkruar nga Pamfleti
Autori është ende në arrati dhe kërkohet nga rreth 400 forca policie, ndërsa FBI ka hyrë në hetim. Universiteti u izolua për orë të tëra, me studentët të mbyllur në klasa për shkak të frikës se autori mund të ishte ende në zonë. Ngjarja ndodhi gjatë një ore përgatitore për një provim në lëndën “Parimet e Ekonomisë”....
Dy të rinj kanë humbur jetën dhe nëntë të tjerë janë plagosur rëndë pas një ngjarjeje të rëndë me armë që ndodhi dje në Universitetin Brown në qytetin Providence, Rhode Island, në brigjet lindore të Shteteve të Bashkuara. Të gjithë viktimat janë studentë të universitetit, sipas konfirmimit zyrtar të presidentes së universitetit, Christina Paxton.
Sipas autoriteteve vendore dhe policisë, një person i armatosur hapi zjarr brenda një salle mësimi në katin e parë të godinës Barus & Holley, ku ndodhen Fakulteti i Inxhinierisë dhe Departamenti i Fizikës. Autori, një mashkull ende i paidentifikuar, është larguar me këmbë nga vendi i ngjarjes dhe është ende në kërkim. Pamjet e publikuara nga kamerat e sigurisë e tregojnë teksa largohet nga godina, por fytyra e tij nuk është e dukshme. Sipas dëshmitarëve, ai mund të ketë pasur veshur një maskë me ngjyrë gri, me pamje ushtarake.
Universiteti lëshoi menjëherë një sinjal emergjence për studentët dhe stafin, duke u kërkuar të qëndrojnë të mbyllur brenda ambienteve, të kyçin dyert dhe të fikin telefonat. Për orë të tëra, i gjithë kampusi qëndroi i izoluar, ndërsa forcat e sigurisë kontrolluan zonën me mbështetjen edhe të FBI-së, e cila deklaroi se ka vënë në dispozicion të gjitha burimet e saj për të ndihmuar në kapjen e autorit. Janë sekuestruar edhe gëzhojat në vendin e ngjarjes, por nuk janë dhënë detaje teknike mbi to, për shkak të hetimeve që janë në vazhdim.
Ngjarja ndodhi gjatë një ore rikapitulimi për provimin përfundimtar në lëndën "Parimet e Ekonomisë". Një nga studentet që ndodhej në klasë tregon se dëgjoi disa të shtëna të fuqishme dhe pa disa studentë që u përpoqën të fshiheshin pas katedrës për t’i shpëtuar plumbave. Klasa ku ndodhi sulmi ka një kapacitet prej 186 personash dhe ndodhet në një nga qendrat më të frekuentuara të universitetit.
Për orë të tëra pas të shtënave, pati pasiguri rreth asaj nëse autori ishte neutralizuar apo ende aktiv. Kryetari i bashkisë, Brett Smiley, në një deklaratë për shtyp, konfirmoi se personi i dyshuar nuk ishte arrestuar dhe se nuk kishte informacione për ndonjë kërcënim të dytë. Ndërkohë, autoritetet vijojnë kërkimin me rreth 400 forca policie në terren.
Ish-presidenti amerikan Donald Trump reagoi në rrjetin e tij social duke thënë se ishte informuar për ngjarjen dhe, fillimisht, përhapi lajmin e gabuar se ishte bërë një arrestim, për ta përgënjeshtruar më pas. Ai shtoi se "çfarë tragjedie e tmerrshme" dhe u bëri thirrje amerikanëve të luten për viktimat.
Presidentja e Universitetit Brown shprehu dhimbje për humbjen e dy studentëve dhe u shpreh se përparësi tani ka ofrimi i mbështetjes për familjet dhe komunitetin e studentëve.
Ngjarja ka tronditur rëndë komunitetin akademik amerikan, veçanërisht për shkak të faktit që ndodhi brenda një universiteti elitë dhe në një zonë që konsiderohej e sigurt. Ndërkohë, pyetjet mbi sigurinë në institucionet arsimore në SHBA rikthehen sërish në qendër të debatit publik.
Lini një Përgjigje