FLASH
Shkruar nga Pamfleti
Presidenti i Ukrainës, Volodymyr Zelensky, ka vizituar trupat ukrainase në vijën e frontit në juglindje të vendit dhe ka shpërndarë medalje.
Vizita e tij u bë në një kohë spekulimesh se shefi i ushtrisë ukrainase mund të shkarkohet.
“Kam nderin të jem këtu sot, për t’i mbështetur luftëtarët dhe për t’i shpërblyer ata. Ata përballen me mision të vështirë dhe kritik për ta zmbrapsur armikun dhe për ta mbrojtur Ukrainën”, tha Zelensky në një komunikatë për mediat, pasi vizitoi rajonin e Zaporizhjas.
Presidenca ukrainase tha se Zelensky i vizitoi pozicionet ushtarake ukrainase në afërsi të fshatit Robotine, i cili ndodhet pothuajse në vijën e frontit.
Pjesa juglindore e Robotines u çlirua në fund të gushtit gjatë kundërofensivës ukrainase kundër forcave ruse.
Zelensky e vizitoi frontin e betejës në një kohë pasigurish për fatin e shefit të ushtrisë ukrainase, Valeriy Zaluzhny.
Sipas Reuters, Qeveria ukrainase ka njoftuar Shtëpinë e Bardhë se po planifikon ta shkarkojë komandantin kryesor të ushtrisë, i cili është udhëheqës i luftës kundër forcave pushtuese ruse.
Dyshimet për shkarkimin e Zaluzhny, i cili ka pasur mospajtime me Zelenskyn për një sërë çështjesh, vijnë pas kundërofensivës ukrainase të vitit të kaluar, e cila dështoi në çlirimin e territorit të pushtuar nga Rusia.
Lini një Përgjigje