FLASH
Shkruar nga Pamfleti
Sulmi me dronë i 22 majit ndaj një kompleksi arsimor në Luhansk, ku sipas palës ruse humbën jetën disa persona, shkaktoi reagim të ashpër nga Moska.
Zëdhënësja e Ministrisë së Jashtme ruse, Maria Zakharova, në një postim në Telegram, paralajmëroi përgjigje të fortë nga Rusia dhe u bëri thirrje diplomatëve të huaj të largohen nga Kievi.
“Regjimi i Zelenskyt dhe sponsorët e tij perëndimorë, që furnizojnë Forcat e Armatosura të Ukrainës me armë për krime kundër popullit tonë, i treguan gjithë botës shpërfilljen e tyre të hapur ndaj normave të së drejtës humanitare ndërkombëtare”, shkroi Zakharova.
“Të gjitha këto kanë kaluar kufijtë e durimit. Në kushtet aktuale, Forcat e Armatosura të Federatës Ruse po kryejnë sulme sistematike ndaj ndërmarrjeve të kompleksit ushtarako-industrial ukrainas në Kiev, përfshirë objekte konkrete të projektimit, prodhimit, programimit dhe përgatitjes për përdorimin e UAV-ve”, shtoi ajo.
Sipas Zakharovës, dronët “përdoren nga regjimi i Kievit me ndihmën e specialistëve të NATO-s, përgjegjës për furnizimin me komponentë, dhënien e informacioneve dhe koordinimin e objektivave”.
“Do të kryhen goditje si ndaj qendrave të vendimmarrjes, ashtu edhe ndaj qendrave të komandës”, deklaroi ajo.
Zakharova paralajmëroi gjithashtu shtetasit e huaj dhe personelin diplomatik që të largohen nga kryeqyteti ukrainas.
“Duke qenë se objektet e përmendura ndodhen në zona të ndryshme të Kievit, paralajmërojmë shtetasit e huaj, përfshirë personelin e misioneve diplomatike dhe përfaqësive të organizatave ndërkombëtare, për nevojën që të largohen nga qyteti sa më shpejt të jetë e mundur”, tha ajo.
Ajo u bëri thirrje edhe banorëve të Kievit “të mos afrohen pranë objekteve ushtarake dhe administrative të regjimit të Zelenskyt”.
Lini një Përgjigje