FLASH
Shkruar nga Pamfleti
Nga njëra anë janë Rubio dhe Kellogg që përpiqen të kenë ndikim më të madh te Presidenti Trump veçanërisht përsa i takon raporteve me Putin, ndërsa në anën tjetër qëndron Witkoff
Një luftë e heshtur për pushtet po shpërthen në Shtëpinë e Bardhë! Sa i ashpër duhet të jetë Presidenti i SHBA Donald Trump ndaj diktatorit rus Vladimir Putin? Ndërsa diskutimet po zhvillohen pas dyerve të mbyllura, dy kampe po shfaqen midis këshilltarëve më të afërt të Trump.
Siç raporton Wall Street Journal (WSJ), zyrtarë të rangut të lartë të qeverisë po i kërkojnë Trumpit të marrë një qëndrim më të ashpër kundër Moskës. Sekretari i Shtetit, Marco Rubio, dhe i dërguari i Ukrainës Keith Kellogg nuk shohin dëshirë të vërtetë për paqe nga ana e Putinit dhe pozicionohen kundër besimit të tepërt te Kremlini.
Këshilla që i jepet Trump është: asnjë lëshim për Rusinë për sa kohë që Moska vazhdon të kërkojë territorin ukrainas dhe nuk i ndal sulmet.
Por Trump aktualisht duket se po dëgjon më shumë të dërguarin e tij Steve Witkoff, i cili tashmë ka folur personalisht me Putinin dy herë në Moskë dhe është i bindur se diktatori rus dëshiron paqen. Witkoff u shfaq i prekur pas dialogëve të Putinit dhe propagandës së përsëritur ruse, duke shkaktuar tronditje në Kiev dhe kryeqytetet e BE-së.
Sepse faktet flasin një gjuhë tjetër: Rusia ka injoruar një armëpushim të kërkuar nga Trump dhe po zvarrit negociatat. Në vend të kësaj, Kremlini po përdor kohën për të marrë përfitime të mëtejshme ushtarake – me sa duket me shpresën për të detyruar lëshime më të mëdha në tryezën e bisedimeve.
Një sulm brutal me raketa ruse në qytetin ukrainas të Sumy, që vrau 34 civilë dhe plagosi më shumë se 100 persona të dielën, ka rritur më tej tensionet në Shtëpinë e Bardhë. Ndërsa Trump e quajti masakrën një "gabim" dhe fajësoi Joe Biden, Rubio dhe Kellogg gjetën fjalë më të qarta: Rubio e quajti sulmin "mizor dhe tragjik", ndërsa Kellogg foli për një "shkelje të çdo mirësjelljeje".
Vetë Trump kritikoi gjithashtu Putinin dhe tha se presidenti rus ishte “kryesisht përgjegjës” për luftën, por sërish fajësoi edhe paraardhësin e tij Joe Biden dhe presidentin ukrainas Volodymyr Zelensky. Por Trump nuk ka aplikuar ende ndonjë masë konkrete, siç janë sanksionet e reja kundër eksporteve ruse të naftës.
Sipas WSJ, ka debate intensive në Shtëpinë e Bardhë nëse duhet të forcohen sanksionet kundër Rusisë në mënyrë që të detyrohet Putini në negociata reale. /Përshtati Pamfleti/
Lini një Përgjigje